Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 687 Hüküm no: 1113 Orijinal metin no: [91a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın Zenci köle Beşir’i satın aldığını ispatladığı Ma‘rûz; Medîne-i Üsküdar’da Hasanağa mahallesinde sâkine mu‘arrefetü’z-zât Şerife Nefise bt. Ahmed nâm hatun medîne-i mezbûrede mahfil-i bâbda meclis-i şer‘-i hatîrde zikri âtî gulâma vaz‘-ı yedi mütehakkık olan kezâlik zâtı mu‘arrefe Âişe bt. Mehmed Ârif nâm hatun muvâcehesinde yedi sene mukaddem ismi ma‘lûmum olmayan nâm kimesneden hâmil olmak üzere iştirâ eylediğim Esyahi? bt. Abdullah nâm câriyenin altı ay mürûrunda tevellüd eylediği işbu mu‘âyene olunan Beşir nâm sagīr Zenci abd-i memlûkem iken târih-i i‘lâmdan iki ay mukaddem yedimden zâyi‘ olup mezbûre Âişe’nin yedinde bulmamla bi’l-istihkāk taleb ederim deyü da‘vâ ve mezbûre Âişe Hatun cevâbında fi’l-hakīka sagīr gulâm-ı mezbûr müdde‘iye-i mezbûrenin bundan akdem yedinde abd-i memlûkesi olduğunu ikrâr lâkin müdde‘iye-i mezbûre Şerife Nefise gulâm-ı mezbûr Beşir’i târih-i i‘lâmdan iki sene mukaddem gāibetü ani’l-meclis Anber bt. Abdullah nâm Zenciye’ye beş guruş semen-i makbûza bey‘ u temlik ol dahi iştirâ ve kabûl edip yedinde mülkü iken mezbûre Anber vefât edip gulâm-ı mezbûr mezbûre Anber’in zevci Selim b. Abdullah’ın hissesine isâbet ve ba‘dehû mezbûr Selim vefât edip gulâm-ı mezbûr mevlâsının oğlu işbu hâzır bi’l-meclis es-Seyyid Mehmed Sadık b. el-Hâc Ali’ye mevrûs ve mezbûr es-Seyyid Mehmed Sadık dahi gulâm-ı mezbûr Beşir’i ceddesi işbu hâzıratü bi’l-meclis Şerife Ümmügülsüm bt. Ali nâm hatuna hibe ve temlik ol dahi otuz beş guruş semen-i makbûza bana bey‘ u temlik ben dahi iştirâ ve kabûl ve ol-vechile gulâm-ı mezbûr Beşir tedâvül-i eyâdî ile mülk-i müşterâm olmuşdur deyü ba‘de’d-da‘vâ ve’l-inkâr dâfi‘a-i mezbûre Âişe Hatun ber-vech-i muharrer def‘ini udûlden Ömer b. Ali ve Abdullah b. Abdullah nâm kimesneler şehâdetleriyle ber-nehc-i şer‘î müdde‘iye-i mezbûre Şerife Nefise Hatun muvâcehesinde isbât etmeğin mûcebiyle müdde‘iye-i mezbûre da‘vâ-yı mezkûresiyle mezbûre Âişe’ye bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 9 min-Ca sene 1206