Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 688 Hüküm no: 1115 Orijinal metin no: [91b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımpaşa’daki Cami‘-i kebîr Vakfına ait evin tasarrufunda meydana gelen ihtilafın giderildiği Ma‘rûz; Mahrûse-i Galata muzâfâtından kasaba-i Kasımpaşa’da vâki‘ Câmi‘-i Kebîr Vakfı mülhakātından Mustafa Reis nâm sâhibü’l-hayrın aşr-ı şerîf ve cihât-ı sâiresi vakfının hâlâ mütevellîsi İmâm Ahmed Efendi b. el-Hâc Mustafa tarafından ber-vech-i âtî vekîl olduğu Mustafa Efendi b. İsmail ve Kayyım Molla Ali b. Mehmed nâm kimesneler şehâdetleriyle sâbit olan vakf-ı mezbûrun kâtib ve câbîsi Hafız es-Seyyid el-Hâc Mustafa Efendi b. Mehmed medîne-i Üsküdar’da meclis-i şer‘-i hatîrde vakf-ı mezbûr musakkafâtından zikri âtî bir bâb vakıf menzile bi’l-icâreteyn mutasarrıf olan Bostanî Mehmed b. Hüseyin mahzarında medîne-i mezbûrede Turbali mahallesinde vâki‘ bir tarafdan Elifoğlu Mehmed Beşe ve bir tarafdan Külahlı el-Hâc Mehmed ve bir tarafdan Kasab Ahmed Beşe menzilleri ve bir tarafdan tarîk-i âm ile mahdûd terbî‘an iki yüz yirmi beş zirâ‘ arsa üzerine mebnî büyût-ı adîde ve müştemilât-ı sâireyi hâvî beher mâh otuzar akçe icâre-i müeccelesi olan bir bâb vakıf menzil bundan akdem es-Seyyid Feyzullah ve Zeyneb nâm zevcânın tasarruflarında iken eş-Şeyh Mustafa Haydar Efendi’ye, ol dahi Berber Selim nâm kimesneye, ol dahi işbu mezbûr Bostanî Mehmed’e bâ-ma‘rifet-i mütevellî ferâgat edip lâkin mezbûr Bostanî Mehmed’in işbu menzil-i mezkûr ittisâlinde âhar menzili olup eğerçi hudûdları ma‘lûm lâkin hadd-i fâsılı olan tahta perdenin inhidâmına binâen mahlût olmağla menzileyn-i mezkûreyn beynine alâmât-ı fâsıla vaz‘ıyla ifrâz ve zimmetinde terâküm eden iki senelik icâre-i müecceleyi edâ ve teslîm[e] tenbîh olunmak bi’l-vekâle murâdımdır deyü da‘vâ ve mezbûr Bostanî Mehmed cevâbında fi’l-hakīka menzil-i mezkûr vakf-ı mezbûrun musakkafâtından olarak olup tedâvül-i eyâdî ile tasarruf olunagelip hâlâ icâreteyn ile taht-ı tasarrufunda olduğunu ikrâr ve ber-vech-i muharrer ittisâlinde olan âhar vakıf menzil beynine alâmât-ı fâsıla vaz‘ına ve zimmetinde terâküm eden iki senelik altı guruş icâre-i müeccelesini edâya ta‘ahhüd eylediği Üsküdar mahkemesinde tescîl ve bi’l-iltimâs huzûr-ı âlîlerine i‘lâm olundu. Fî-selhi Ca sene 1205