Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 689 Hüküm no: 1117 Orijinal metin no: [91b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İsmail ile Cizyedar Hasan Ağa’nın alacak davasında sulh oldukları Ma‘rûz; Medîne-i Üsküdar’da Bulgurlu mahallesinde sâkin sâhib-i arzuhâl es-Seyyid İsmail b. İbrahim nâm kimesne medîne-i mezbûrede mahfil-i bâbda meclis-i şer‘-i hatîrde bin iki yüz dört senesi medîne-i mezbûrede cizyedâr olup derûn-ı arzuhâlde mezkûrü’l-ism Hasan Ağa b. Hüseyin mahzarında mezbûr Hasan Ağa sene-i mezbûrede cânib-i mîrîden cibâyetine memûr olduğu cizye evrâkından yedinden ahz ü kabz ve der-uhde ve iltizâm eylediğim cizye evrâkının hesâbını sahîhan rü’yet ve makbûzâtımdan ücret ve mesârifimi ihrâc olundukdan sonra zimmetimde zuhûr eden dokuz yüz guruş deynim içün sene-i mezbûre Zilhiccesinin gurresi târihiyle müverrah, mümzâ ve mahtûm bir kıt‘a deyn temessüğü i‘tâ ve deyn-i mezkûru yirmi gün tamamında edâya ta‘ahhüd etmiş idin deyü bundan akdem benden taleb ve da‘vâ ve ba‘de’l-ikrâr meblağ-ı merkūmun edâsıyla şer‘an i‘lâm olunmağla meblağ-ı mahkûmün-bih dokuz yüz guruşu tamamen benden ahz ü kabz etmiş idi lâkin hîn-i hesâbda otuz altı a‘lâ ve yirmi evsat ve on iki ednâ evrâklarını sehven hesâb-ı mezkûra idhâl olunmağla evrâk-ı merkūmun kıymetleri olan beş yüz otuz dokuz guruş ile zimem-i nâsda henüz kabz olunmayıp mümteni‘ü’l-husûl olan üç yüz altmış bir guruş ki cem‘an dokuz yüz guruşu bâ-i‘lâm-ı mahkûmün-bih benden ahz eylediğine binâen istirdâd ederim deyü eylediği da‘vâsından bâ-tavassut-ı muslihîn altmış guruş bedel-i makbûza mezbûr Hasan Ağa ile sulh olup ziyâde müdde‘âsı olan sekiz yüz guruşa ve işbu târih-i i‘lâma gelince beynlerinde cereyân eden cemi‘ ahz ü i‘tâ ve mu‘âmelât-ı şettâya ve sâire müte‘allika âmme-i de‘âvîden mezbûr Hasan Ağa’nın zimmetini ibrâ-yı âmm-ı kātı‘u’n-nizâ‘ ile ibrâ ve ıskāt eylediğinde ol dahi bedel-i sulh nâmıyla medfû‘u olan meblağ-ı merkūm altmış guruşa müte‘allika âmme-i de‘âvîden müdde‘î-i mezbûr es-Seyyid İsmail’in zimmetini ibrâ ve ıskāt ve her biri ber-minvâl-i muharrer âharın ibrâsını kabûl ve bu vechile beynleri ıslâh ve kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 17 min-C sene 1206