Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 690 Hüküm no: 1118 Orijinal metin no: [91b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hanım’ın kocası Feyzullah’a devrettiği vakıf menzildeki hissesini geri almak talebinde bulunduğu Ma‘rûz; Medîne-i Üsküdar’da Arakıyeci el-Hâc Cafer mahallesinde sâkine mu‘arrefetü’z-zât Havva bt. Abdullah nâm hatun medîne-i mezbûrede mahfil-i bâbda meclis-i şer‘-i hatîrde zevc-i mutallıkı Feyzullah b. Ahmed mahzarında medîne-i mezbûrede vâki‘ merhûm Misivrili Haseki Mustafa Ağa Vakfı’nın kāimmakām-ı mütevellîsi Hafız İsmail Efendi hâzır olduğu halde ol dahi i‘lâmdan üç sene mukaddem vakf-ı mezbûr musakkafâtından olup mahalle-i mezbûrede kâin bi’l-icâreteyn taht-ı tasarrufumda olan ma‘lûmü’l-hudûd ve’l-müştemilât bir bâb vakıf menzilimin nısf hissesini mütevellî-i mezbûr ma‘rifetiyle zevcim mezbûr Feyzullah’a ferâğ ve tefvîz etmiş idim lâkin ferâğ-ı mezkûr beni ölünce beslemek şartıyla meşrût olmağla fesâdına binâen nısf hisse-i mezkûreyi bana redd ü teslîm etmek üzere zevcim mezbûr Feyzullah’a tenbîh olunmak matlûbumdur deyü da‘vâ eyledikde ol dahi ikrâr ü i‘tirâf etmeğin mûcebiyle nısf menzil-i mezkûru müdde‘iye-i mezbûreye redd ü teslîme mezbûr Feyzullah’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 14 min-C sene 1206