Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 691 Hüküm no: 1119 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çoban Pavli v. Miço’nun Çoban İlya tarafından yaralandığı Ma‘rûz; Medîne-i Üsküdar’a muzâfe Yoros nâhiyesine tâbi‘ Çekme karyesinde mütemekkin olup vech-i âtî üzere meşcûc ve kara bere ve meksûr olan Pavli v. Miho [Miço] nâm zimmî medîne-i mezbûrede mahfil-i bâbda meclis-i şer‘-i hatîrde bast-ı kelâm ve ifâde-i merâm edip refîkim gāib ani’l-meclis Çoban İlya nâm zimmî târih-i i‘lâmdan iki gece mukaddem vakt-i ışâda karye-i mezbûrede vâki‘ koyun ağılı odasında bi-gayrı hakkın amden bıçak ile başımın üstünden bir yerinden darb hâşimeten şec ve sopa ta‘bîr olunur âsâ-yı kebîr ile burnumun üzerinden darb ve kemiğini kesr eylediğinden mâ‘adâ arka ve belime dahi darb ve kara bere etmekle keşf ve mu‘âyene olunmak matlûbumdur dedikde cerrâh tâifesinden el-Hâc Ali ve sâir mazbûtü’l-esâmî Müslimîn ile a‘zâsına nazar olundukda fi’l-hakīka merkūm Pavli zimmînin a‘zâsının ber-vech-i muharrer başı üzerinden meşcûc ve burnunun kemiği meksûr ve kara bere idiği lede’l-keşf ve’l-mu‘âyene zâhir olunduğu [olduğu] bi’l-iltimâs huzûr-ı âlîlerine i‘lâm olundu. Fî 28 min-C sene 1206