Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 691 Hüküm no: 1120 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çoban Pavli’nin kendisini yaralayan İlya ile sulh olduğu Ma‘rûz; Medîne-i Üsküdar’a muzâfe Yoros nâhiyesine tâbi‘ Çebni? karyesinde mütemekkin olup ber-vech-i âtî meşcûc ve kara bere ve meksûr idiği lede’l-keşf ve’l-mu‘âyene zâhir olan Çoban Pavli v. Miço nâm zimmî medîne-i mezbûrede meclis-i şer‘-i hatîrde yine Çoban İlya v. Kirkor nâm zimmî tarafından ber-vech-i âtî tasdîka vekîl olan İsmail Beşe b. Mustafa nâm kimesne mahzarında müvekkil-i merkūm İlya zimmî târih-i i‘lâmdan üç gece mukaddem vakt-i ışâda karye-i mezbûrede vâki‘ koyun ağılı odasında bi-gayrı hakkın amden bıçak ile başımın üstünden bir yerinden darb ve hâşimeten şec ve sopa ta‘bîr olunur âsâ-yı kebîr ile burnumun üzerinden bir yerinden darb ve kemiğini kesr eylediğinden mâ‘adâ arka ve belime dahi darb ve kara bere etmekle mûcib-i şer‘îsini taleb ederim deyü müdde‘î-i merkūm Pavli zimmî ber-vech-i muharrer eylediği da‘vâsından bâ-tavassut-ı muslihîn on yedi buçuk guruş bedel-i makbûza sulh olup zikr olunan şecce ve kara bereye ve kesre ve mâ-yuhdesü minhe müte‘allika âmme-i de‘âvîden müvekkil-i merkūm İlya zimmînin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 26 min-C sene 1206