Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 692 Hüküm no: 1123 Orijinal metin no: [92a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın kocası Ahmed b. Ataullah’dan boşandığını ispatlayamadığı Ma‘rûz; Medîne-i Üsküdar’da Arakıyeci el-Hâc Mehmed mahallesinde sâkine Hadice bt. Mehmed nâm hatun tarafından ber-vech-i âtî vekîl olduğu zât-ı mezbûreyi bi’l-ma‘rifeti’ş-şer‘iye ârifân İmâm Zeynelabidin b. eş-Şeyh Mehmed ve es-Seyyid Musa b. Halil nâm kimesneler şehâdetleriyle sâbit olan vâlidesi zâtı mu‘arrefe Fatıma bt. Mustafa nâm hatun meclis-i şer‘-i hatîrde dâmâdı Ahmed b. Ataullah mahzarında mezbûr Ahmed kızım müvekkile-i mezbûrenin zevc-i dâhili olup târih-i i‘lâmdan dört gün mukaddem kızım müvekkile-i mezbûreyi tatlîk etmekle zimmetinde mütekarrir ve ma‘kūdun-aleyh olan yüz on altı guruş mehrini bi’l-vekâle taleb ederim deyü ba‘de’d-da‘vâ ve’l-istintâk mezbûr Ahmed cevâbında müvekkile-i mezbûre zevce-i medhûlün-bihâsı olduğunu ikrâr lâkin tatlîkini inkâr etmeğin müdde‘iye-i mezbûre ber-vech-i muharrer müdde‘âsını beyân ve isbâta kādir[e] olamayıp bi’t-taleb mezbûr Ahmed gıbbe’t-tahlîfi’ş-şer‘î mûcebiyle müdde‘iye-i mezbûre husûs-ı mezkûrede mezbûr Ahmed’e bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 26 min-Ca sene 1206