Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 695 Hüküm no: 1129 Orijinal metin no: [92b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Harpûtî Alemdar Seyyid Mustafa ile Hasan Beşe’nin ırzlarıyla mukayyed olmaları kaydıyla kefalete bağlandıkları Ma‘rûz; Medîne-i Üsküdar’da Hacce Hatun mahallesi İmâmı es-Seyyid Mehmed Said Efendi b. Ahmed ve Müezzin es-Seyyid Molla Süleyman b. Mehmed ve cemâ‘atinden eş-Şeyh İsa Efendi b. Mehmed ve es-Seyyid Halil Efendi b. Hasan ve Ahmed Ağa b. Mehmed ve el-Hâc Hasan b. Ali ve Hafız İbrahim b. Ebûbekir ve Ömer Ağa b. İbrahim ve Ahmed Ağa b. Hasan ve Molla Halil b. Ahmed ve İsa b. Musa nâm kimesneler meclis-i şer‘-i hatîrde mahalle-i mezbûrede sâkinler Harpûtî Alemdar es-Seyyid Mustafa b. Mehmed ve Hasan Beşe b. Hüseyin nâm kimesne mahzarlarında mezbûr es-Seyyid Mustafa târih-i i‘lâmdan bir gece mukaddem silâh ile mezbûr Hasan’ın menzili kapısına varıp birbirilerine nefsâniyet ve şütûm-ı galîza ile şetm-i galîza ile şetm ve ol-vechile ahâli-i mahalleyi tekdîr ve bî-huzûr eyledikleri iştikâlarıyla lede’l-mürâfa‘a zâhir ve li-ecli’t-tedîb habs ve sû-i hâlleri i‘lâmıyla Bâb-ı âlî’ye irsâli iktizâ etmiş idi lâkin fî-mâ ba‘d mezbûrân es-Seyyid Mustafa ve Hasan harekât-ı nâ-marzıyede bulunmayıp kendi ırzlarıyla mukayyed olmak üzere ta‘ahhüd ve hilâf-ı şer‘ hareketleri zuhûr eder ise huzûr-ı hükkâma ihzârlarına mezbûr Hasan’a es-Seyyid İsmail b. Hasan ve mezbûr es-Seyyid Mustafa’ya es-Seyyid Halil Efendi b. Hasan tekeffül ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 19 min-C sene 1206