Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 696 Hüküm no: 1132 Orijinal metin no: [92b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sepetçi esnafı arasında kestane ve fındık çubuğu iştirâsı hususunda ortaya çıkan ihtilafın giderilmesi Ma‘rûz; Medîne-i Üsküdar’da Selami mahallesi mütemekkinelerinden şahısları mu‘arrefe Saliha bt. Mehmed ve Ümmügülsüm bt. İsmail ve diğer Saliha bt. Mehmed ve Canfeda bt. Mehmed nâm Kıbtiyeler medîne-i mezbûrede mahfil-i bâbda meclis-i şer‘-i hatîrde yine [medîne-i] mezbûrede kâin Balaban İskelesi kurbünde sepetci esnâfının Ahu [Ahî] babası İbrahim b. Mustafa ve Osman b. Halil ve Hüseyin b. Mehmed ve Ali b. Osman ve Mustafa b. Ahmed nâm kimesneler mahzarlarında bizler dahi sepetci tâifesinden olup medîne-i mezbûrede esnâf-ı mezkûre misillü ibâdullâhın iktizâ eden küfe ve sepetlerini [îmal] ve gerek ta‘mîr edegelip esnâf-ı mezkûreye husûsiyeti yoğiken bu esnâda medîne-i mezbûre iskelesine sefîne ile gelen kestane ve fındık çubuğunu bizim ma‘rifetimiz olmadıkça sizler iştirâ etmeyin sizi darb ederiz deyü bizi ihâfe ve ashâbı yedinden kifâyet mikdârı sepet çubuğunu iştirâdan bizleri külliyen men‘ ve kesb-i ta‘ayyüşümüze mâni‘ olmalarıyla suâl olunup bi-gayrı vechin müdâhaleleri men‘ u def‘ olunmak matlûbumuzdur deyü da‘vâ eylediklerinde onlar dahi fî-mâ ba‘d medîne-i mezbûreye sefîne ile gelen kestane ve fındık sepet çubuğunu tâife-i merkūmânın kifâyet mikdârı ashâbı yedinden iştirâlarına bi-gayrı vechin müdâhale etmemek üzere her biri ta‘ahhüd edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 29 min-C sene 1206