Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 697 Hüküm no: 1133 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hanım’ın Hüseyin Beşe’den alacaklı olduğu yolundaki iddiasını ispatlayamadığı Ma‘rûz; Medîne-i Üsküdar’da Arakıyeci el-Hâc Mehmed mahallesinde sâkine mu‘arrefetü’z-zât Şerife Fatıma bt. İbrahim nâm hatun medîne-i mezbûrede mahfil-i bâbda meclis-i şer‘-i hatîrde Hüseyin Beşe b. Ahmed mahzarında târih-i i‘lâmdan üç sene mukaddem bir husûs içün diyâr-ı âhara azîmet etmemle mahalle-i mezbûrede vâki‘ taht-ı tasarrufumda olan ma‘lûmü’l-hudûd ve’l-müştemilât bir bâb menzilimi mezbûr Hüseyin Beşe yedine li-ecli’l-hıfz emâneten teslîm etmiş idim lâkin mezbûr Hüseyin Beşe menzil-i mezkûru iznimsiz beher şehr ellişer para ücret ile târih-i i‘lâma gelince üç sene fuzûlî âhara îcâr etmekle üç senelik makbûzu olan kırk beş guruş ve menzil-i mezkûrun arsasından âhara bey‘ eylediği kerpi[ç] semeninden on yedi guruş ve menzil-i mezkûrun odasında dolap derûnunda vaz‘ eylediğim emlâkimden mecmû‘-ı kıymetleri on guruşa bâliğ ber-mûceb-i defter eşyâmı dahi âhara bey‘le istihlâk etmekle kıymet-i mezkûresi olan on guruş ki cem‘an cihât-ı merkūmeden yetmiş iki guruş zimmetinde hakkım olmağla taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âsını isbâta kādir[e] olamayıp tahlîfe dahi tâlibe olmamağla mûcebiyle müdde‘iye-i mezbûre husûs-ı mezkûrede mezbûr Hüseyin Beşe’ye bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî-gurrei Cumâdelâhire sene 1206