Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 697 Hüküm no: 1134 Orijinal metin no: [93a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mikail v. Bogos’un terekesinin vârislerine taksimi esnasında çıkan ihtilafın giderildiği Ma‘rûz; Medîne-i Üsküdar’da Selami mahallesinde mütemekkin iken târih-i i‘lâmdan on bir ay mukaddem hâlik olan Mikâil v. Bogos nâm zimmînin verâseti zevcesi Gül bt. Avadik Nasrâniye ile sulbiye kebîre kızı Turfanda ve sulbî kebîr evlâdları Karabet ve Rapail zimmîlere münhasıra ve tashih meselesi kırk sehmden beş sehmi zevcesi merkūmeye ve yedi sehmi kızı merkūmeye ve on dörder sehmden yirmi sekiz sehmi oğulları merkūmâna isâbeti tahakkukundan sonra merkūm Karabet asâleten ve merkūm Rapail zimmî tarafından ber-vech-i âtî vekîl olduğu Mehmed Ağa b. Mustafa ve Harbeci Mehmed b. Ali nâm kimesneler şehâdetleriyle sâbit olan mu‘arrefetü’ş-şahs Noro bt. David nâm Nasrâniye vekâleten medîne-i mezbûrede mahfil-i bâbda meclis-i şer‘-i hatîrde hâlik-i merkūm Mikâil zimmînin zevcesi kezâlik şahsı mu‘arrefe merkūme Gül Nasrâniye muvâcehesinde babamız hâlik-i merkūm helâkinden üç gün mukaddem zevcesi merkūme Gül Nasrâniye’ye nakden def‘ u teslîm eylediği bin iki yüz guruş terekesinden olup tashîh-i merkūm üzere bize mevrûs olmağla hisse-i irsiyemize isâbet eden dokuz yüz kırk guruşu zevce-i merkūme Gül Nasrâniye’den asâleten ve vekâleten taleb ederiz deyü da‘vâ ol dahi cevâbında işbu sene-i mübâreke Safer’inin yirmi altıncı günü târihiyle müverraha yedime i‘tâ olunan bir kıt‘a i‘lâm-ı şer‘î nâtık olduğu üzere müdde‘iyân-ı merkūmân Karabet ve Rapail zimmîler babaları hâlik-i merkūmun terekesinden mîrâs mutâlebe etdiklerinde bî-vech-i şer‘î mu‘ârazadan men‘ olunmuşlar idi deyü müdde‘iye-i merkūme Gül Nasrâniye ibrâz eylediği mazmûn-ı i‘lâmı şühûd-ı udûl ile isbât etmeğin mûcebiyle müdde‘iyân-ı merkūmân kemâ-fi’l-evvel bî-vech-i şer‘î mu‘ârazadan men‘ olundukları bi’l-iltimâs huzûr-ı âlîlerine i‘lâm olundu. Fî 224 min-C sene 1206