Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 698 Hüküm no: 1135 Orijinal metin no: [93a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav Mustafa’nın bulunduğu mahalleden ihracı hakkında ahalinin talepte bulunduğu Ma‘rûz; Medîne-i Üsküdar’da Kefçe mahallesi İmâmı Osman Efendi b. İbrahim ve cemâ‘atinden Feyzullah b. Ahmed ve es-Seyyid Ömer Ağa b. es-Seyyid Zeynelabidin ve es-Seyyid Mehmed Şûhî Efendi b. Ali ve es-Seyyid Osman b. Mehmed ve el-Hâc Mehmed Ağa b. el-Hâc Ali ve es-Seyyid Mehmed b. el-Hâc Abdi ve Süleyman Ağa b. Ömer nâm kimesneler mahfil-i bâbda meclis-i şer‘-i hatîrde mahalle-i mezbûrede vâki‘ Tabutcular Sûku’nda vâki‘ manav dükkânında Manav Mustafa b. İsmail muvâcehesinde mezbûr Mustafa kendi hâlinde ırzıyla mukayyed olmayıp mahalle-i mezbûre sükkânından hâzır bi’l-meclis Mehmed Emin nâm kimesnenin zevcesini idlâl edip bu misillü harekât-ı nâ-marzıyyeye cesâreti olmağla ol-vechile mezbûr Mustafa’dan emniyetimiz meslûb olmuşdur deyü sû-i hâlini muvâcehesinde ihbâr ve fî-mâ ba‘d mezbûr Mustafa mahalle-i mezbûreden ihrâc olunmak bâbında fermân-ı âlîleri sudûrunu her biri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 10 min-B sene 1206