Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 699 Hüküm no: 1136 Orijinal metin no: [93a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mitro v. Nikola’nın terekesinin vârislerine taksimi esnasında ortaya çıkan ihtilafın giderildiği Ma‘rûz; Mevâdd-ı şer‘iye istimâ‘ı’çün bi’l-iltimâs kıbel-i şer‘den meb‘ûs Mehmed Esad Efendi dâ‘îleri medîne-i Üsküdar’a tâbi‘ Kuzguncuk karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde vilâyet-i Rumeli’nde İstarova kazâsına tâbi‘ Fetrilce? karyesi re‘âyâsından olup mârrü’z-zikr Kuzguncuk karyesinde bağçevân iken bundan akdem hâlik olan Mitro v. Nikola zimmînin verâseti zevcesi Katerina bt. Yorgi nâm Nasrâniye ile li-ebeveyn er karındaşı Dimo veledi’l-merkūm Nikola zimmîye münhasıra ve mesele-i mîrâsları dört sehmden bir sehmi zevce-i merkūmeye ve bâkī üç sehmi karındaşı merkūm Dimo zimmîye isâbeti tahakkukundan sonra merkūm Dimo zimmî meclis-i ma‘kūd-ı mezkûrda zikri âtî bağ ve bağçeye bâ-hüccet-i şer‘iye vâzı‘ü’l-yed olan Yorgi v. Pasko nâm zimmî muvâcehesinde hâlik-i merkūm Mitro zimmînin yedinde mülkü olup Kuzguncuk karyesi hâricinde vâki‘ etrâf-ı erba‘ası merkūm Yorgi zimmî bağı ve Canbo zimmî arsası ve hâlik-i merkūmun taht-ı icâresinde olan bostan ve tarîk-i âm ile mahdûd tahmînen sekiz dönüm mikdârı bir kıt‘a kürûmu mülk müfrez bağ ile yine mahâll-i merkūm hâricinde vâki‘ etrâf-ı erba‘ası Hasan Ağa bağçesi ve Sünbüle Nasrâniye bağçesi ve Terzi İsak Yahûdî tarlası ve tarîk-i âm ile mahdûd bir kıt‘a ayvalık bağçesi ve yine mahâll-i merkūm hâricinde vâki‘ etrâf-ı erba‘ası Canbo ve Todori ve Pelaş zimmîler bağları ve tarîk-i âm ile mahdûd tahmînen otuz dönüm mikdârı bir kıt‘a kürûmu mülk bağ mûrisimiz hâlik-i merkūmun ile’l-helâk yedinde mülkü ve ba‘de-helâkihî terekesinden olup merkūm Yorgi zimmî fuzûlî zabt etmekle teslîme tenbîh olunmak matlûbumuzdur deyü da‘vâ ol dahi cevâbında zikr olunan bağçe ve bağlar hâlik-i merkūmun hayatında mülkü iken yedi yüz otuz guruş semen-i medfû‘ ve makbûza bana bey‘ u temlik ve mebî‘-i mezkûrun gabn ve tağrîrine müte‘allika âmme-i de‘âvîden zimmetimi ibrâ ben dahi ibrâsını kabûl etmiş idim deyü bi’l-cümle takrîr-i meşrûhuna mutâbık iki kıt‘a mübâya‘a hüccetleri ibrâzıyla ba‘de’d-def‘ ve’l-inkâr müdde‘iyân-ı mezbûrân mazmûn-ı hüccet-i mezkûreleri ikrâr ü i‘tirâf etmeleriyle mûcebince müdde‘iyân-ı merkūmânın merkūm Yorgi zimmîye bî-vech mu‘ârazadan men‘ eylediğini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 11 min-Receb sene 1206