Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 699 Hüküm no: 1137 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Ali’nin kendisini at koştururken yaralayan Nimetullah ile bedeli karşılığında sulh olduğu Ma‘rûz; Medîne-i Üsküdar’da Büyük İskele’de odun yarıcı tâifesinden olup ber-vech-i âtî meşcûc idiği lede’l-keşf ve’l-mu‘âyene zâhir olan Ömer b. Ali medîne-i mezbûrede mahfil-i bâbda meclis-i şer‘-i hatîrde Nimetullah b. Feyz[ullah] nâm kimesne mahzarında mezbûr Nimetullah târih-i i‘lâm günü Büyük İskele meydanında at üzerinde râkib olduğu halde bilâ-mûcib sür‘at ile seğirtdirir iken zikr olunan at kıç ayağıyla alnıma ve yüzüme darb ve mütelâhimeten şecc etmekle mûcib-i şer‘îsini mezbûr Nimetullah’dan taleb ederim deyü tasaddî eylediği da‘vâsından bâ-tavassut-ı muslihîn mezbûr Nimetullah ile on guruş bedel-i makbûza sulh olup şecc-i mezkûra ve mâ-yuhdesü minhe müte‘allika âmme-i de‘âvîden mezbûr Nimetullah’ın zimmetini ibrâ ve ıskāt ol dahi ber-vech-i muharrer ibrâsını kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 3 min-B sene 1206