Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 700 Hüküm no: 1138 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Hüseyin ile Takor v. Kirkor’un aralarındaki alacak verecek davasında sulh oldukları Ma‘rûz; Medîne-i Üsküdar’da Kādıasker mahallesinde sâkin sâhib-i arzuhâl Hasan b. Hüseyin nâm kimesne medîne-i mezbûrede meclis-i şer‘-i hatîrde derûn-ı arzuhâlde ismi mezkûr Takor v. Kirkor nâm zimmî muvâcehesinde târih-i i‘lâmdan beş sene mukaddem medîne-i mezbûrede Toptaşı nâm mahâlde vâki‘ mukaddemâ merkūm Takor zimmînin mutasarrıf olduğu duhânî dükkânında müsteciren sâkin iken merkūm Takor zimmînin bi-şarti’r-rücû‘ emriyle dükkân-ı mezkûrun kepenklerini tecdîd ve döşeme ve damlalığını ta‘mîr ve termîm ve yetmiş yedi guruş masrafım olup hattâ târih-i mezkûrda merkūm Takor zimmî ile masrûfâtın hesâbını rü’yet ve meblağ-ı merkūm yetmiş yedi guruş zimmetinde bana deyni olduğunu ikrâr etmekle meblağ-ı merkūm yetmiş yedi guruşu taleb ederim deyü eylediği da‘vâsından bâ-tavassut-ı muslihîn merkūm Takor zimmî ile yedi guruş bedel-i makbûza sulh olup ziyâde müdde‘âsı olan yetmiş guruşa, ol dahi müdde‘î-i merkūmdan iddi‘â eylediği dükkân-ı mezkûr icâresinden yirmi altı ayda zimmetinde müctemi‘a olan otuz dokuz guruşa ve bi’l-cümle husûs-ı mezkûra müte‘allika âmme-i de‘âvîden her biri âharın zimmetini ibrâ ve ıskāt ve her biri ber-minvâl-i muharrer âharın ibrâsını kabûl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 2 min-B sene 1206