Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 700 Hüküm no: 1139 Orijinal metin no: [93b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Eyüb ile boşadığı eşi Emine’nin sulh oldukları Ma‘rûz; Medîne-i Üsküdar’da Kefçe mahallesinde sâkin Ahmed b. Eyüb medîne-i mezbûrede mahfil-i bâbda meclis-i şer‘-i hatîrde zevce-i sâbıkāsı mu‘arrefetü’z-zât Emine bt. Ahmed nâm hatun mahzarında târih-i i‘lâmdan üç ay mukaddem zevciyet beynimizde kāim iken mezbûre Emine Hatun’a zimmetimde deynim olan yirmi guruş mukābelesinde mecmû‘-ı kıymetleri kırk dört buçuk guruşa bâliğ bir Mushaf-ı şerîf ve bir entari ve bir nühâs muşamma‘ fener ve bir yağmurluk ve don ve bir gömleğimi menzilinde bi-tarîki’r-rehn terk etmemle hâlâ meblağ-ı merkūmu ahz ve rihân-ı merkūmeyi bana teslîme tenbîh olunmak matlûbumdur deyü da‘vâ ve beynlerinde ba‘de-vukû‘ı’l-münâza‘a bâ-tavassut-ı muslihîn müdde‘î-i mezbûr rihân da‘vâsından mezbûre Emine meblağ-ı merkūm yirmi guruşdan meccânen fâriğler olup husûs-ı mezkûra müte‘allika âmme-i de‘âvîden her biri âharın zimmetini ibrâ ve ıskāt ve her biri ber-minvâl-i muharrer âharın ibrâsını kabûl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 18 min-Ca sene 1206