Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 701 Hüküm no: 1140 Orijinal metin no: [93b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ahmed’in üvey oğlu İbrahim ile alacak verecek davasında sulh oldukları Ma‘rûz; Medîne-i Üsküdar’da Kādıasker mahallesinde sâkin Mehmed b. Ahmed medîne-i mezbûrede mahfil-i bâbda meclis-i şer‘-i hatîrde üvey oğlu İbrahim b. Hasan mahzarında târih-i i‘lâmdan yirmi dört ay mukaddem mezbûr İbrahim beni ölünce görüp gözetmek şartıyla mahalle-i mezbûrede vâki‘ ber-mûceb-i temessük ma‘lûmü’l-hudûd bir bâb vakıf menzilimi mezbûr İbrahim’e ferâğ ve tefvîz ve nakden yirmi beş guruş ve otuz iki aded İslâmbol altunu ile bir hoşâb tası ve bir tebsi ve iki kilim ve bir entari ve bir şayak şalvar ve üç çeki hatab ve iki balta ve bir kazmamı hibe-i sahîh-i şer‘iye ile mezbûr İbrahim’e bi-safkatin-vâhidetin hibe ve yine bâ-hüccet-i şer‘iye bir minder ve bir döşek ve bir kazgan ve bir keçe ve bir tenceremi mezbûr İbrahim’e on guruşa bi-safkatin-vâhidetin bey‘ u temlik ve semen-i mezkûr on beş guruş mutâlebesinden zimmetini ibrâ ve ıskāt ol dahi ber-minvâl-i muharrer ittihâb ve iştirâ ve tefevvüz ve kabûl etmiş idi menzil-i mezkûru yüz guruşa âhara ferâğ etmekle bedel-i merkūm yüz guruş ile zikrleri mürûr eden nakd yirmi beş guruş ve otuz iki aded altun ile eşyâ-i muharrere-i mezkûrenin mevcûd ise a‘yânını müstehleke ise ba‘de’s-sübût kıymetlerini taleb ederim deyü eylediği da‘vâsından bâ-tavassut-ı muslihîn mezbûr İbrahim ile yirmi guruş bedel-i makbûza sulh olup bedel-i mezkûr yüz guruşa ve zikrleri mürûr eden nakd yirmi beş guruşa ve otuz iki aded altun ve eşyâ-i muharrere-i mezkûreye ve kıymetlerine ve bi’l-cümle husûs-ı mezkûra müte‘allika âmme-i de‘âvîden mezbûr İbrahim’in zimmetini ibrâ ve ıskāt ol dahi bedel-i sulh nâmıyla medfû‘u olan meblağ-ı merkūm yirmi guruşa müte‘allika âmme-i de‘âvîden müdde‘î-i mezbûrun zimmetini ibrâ ve ıskāt ve her biri ber-minvâl-i muharrer âharın ibrâsını kabûl ve bu vechile beynleri ıslâh olunduğu bi’l-iltimâs huzûr-ı âlîlerine i‘lâm olundu. Fî ( ) min-C sene 1206