Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 703 Hüküm no: 1143 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Süleyman ile Emine’ye tazir cezası verilmesi Ma‘rûz; Medîne-i Üsküdar’da Kādıasker mahallesi İmâmı Mehmed Emin Efendi b. el-Hâc Osman ve Müezzin Hafız Ahmed b. Osman ve cemâ‘atinden Mehmed b. Ali ve el-Hâc Ali b. Ali ve Hüseyin b. Mahmud ve Feyzullah b. el-Hâc Mehmed ve Hasan b. Hüseyin ve Hasan b. İbrahim ve Hafız Ahmed b. Mahmud ve Mustafa b. Mehmed ve es-Seyyid Mehmed b. Ahmed ve Mustafa b. Mehmed ve Mustafa b. Abdullah ve Mehmed b. Mustafa ve Zeynelabidin b. Ahmed ve Ahmed b. İsmail ve Mahmud b. Hasan ve Mehmed b. Süleyman ve Osman b. Veli ve Osman b. Mehmed ve İbrahim b. İbrahim nâm kimesneler meclis-i şer‘-i hatîrde Üsküdar ustası ma‘rifetiyle ahz ve meclis-i şer‘a ihzâr olunan mu‘arrefetü’z-zât Emine bt. Abdullah ve kendiye ecnebî olan Bostanî Süleyman b. Mustafa mahzarlarında mezbûre Emine kendi hâlinde olmayıp dâimâ kendiye nâ-mahrem olan mezbûr Bostanî Süleyman ile icrâ-yı fısk içün cem‘ olup ve mezbûr Süleyman gecelerde âlât-ı harb ile geşt ü güzâr etmeleriyle mezbûrâna ef‘âl-i şenî‘ayı niçün irtikâb edersin deyü nush ü pend olundukda mütenassıh ve mütenebbih olmadıklarından mâ‘adâ her birinin menzili kapısına katran sürüp ve boynuz asıp ve itâle-i lisân edip hattâ târih-i i‘lâm gecesi yine mezbûr Süleyman ile icrâ-yı fısk içün cem‘ oldukları hâlde Üsküdar ustası ma‘rifetiyle ahz olunmalarıyla mezbûrândan emn ü rahatımız meslûb olmuşdur deyü sû-i hâllerini muvâcehelerinde ihbâr ve mezbûrânın ta‘zîr ve tedîblerini mezbûrûndan her biri istid‘â eyledikleri bi’l-iltimâs huzûr-ı âlîlerine i‘lâm olundu. Fî 17 min-B sene 1206