Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 705 Hüküm no: 1147 Orijinal metin no: [94a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çubukçu Aron’un çubukçu dükkânı açması Ma‘rûz; Medîne-i Üsküdar’a tâbi‘ Kuzguncuk karyesi mütemekkinlerinden arzuhâl eden Çubukcu Aron v. Yuda nâm Yahûdî medîne-i mezbûrede mahfil-i bâbda meclis-i şer‘-i hatîrde çubukcu esnâfının kethudâları es-Seyyid el-Hâc Ali b. Mahmud ve yiğitbaşı el-Hâc Mustafa b. Ömer ve Boşnak Mustafa b. Hasan ve Ali b. Ahmed ve Mehmed Emin b. İbrahim ve Ebûbekir b. Mehmed ve Ahmed b. Hasan ve Feyzullah b. Mustafa ve Mustafa b. Hasan ve Ebûbekir b. Abdullah ve Süleyman b. İbrahim ve Mehmed Emin b. İbrahim ve Ali b. Ahmed nâm kimesneler mahzarlarında bundan akdem esnâf-ı mezkûre medîne-i mezbûrede Büyük Hamam kurbünde çubukculuk işlemek üzere küşâ[d] eylediğim dükkânı sedd ü bend ve şirâma ta‘arruz ve mümâna‘at etmeleriyle mümâna‘atları men‘ olunmak matlûbumdur dedikde esnâf-ı mezbûre ustaları cevâblarında işbu yedimizde olan emr-i âlî-şânda tasrîh olunduğu vech üzere İslâmbol ve havâlîsinde yüz elli aded mu‘teber çubukcu gediği ve hâric ez-emr altmış aded mülâzımîn gediğinden gayri müceddeden ihdâsı ve mahâll-i âhara gedik nakli ve bilâ-gedik istediği mahâlde işlemek hilâf-ı emr ve muhill-i nizâmımızdan olup bu âna değin Yahûdî tâifesinden Üsküdar’da çubukcu olagelmiş değil iken merkūm Aron Yahûdî medîne-i mezbûrede Büyük Hamam kurbünde küşâd eylediği çubukcu dükkânı binâen-aleyh sedd ü bend olunmuş idi deyü takrîr-i meşrûhlarına mutâbık iki kıt‘a emr-i âlî-şân ve bir kıt‘a i‘lâm ibrâzıyla beynlerinde ba‘de-vukû‘ı’l-münâza‘a esnâf-ı mezkûre ustaları sâlifü’z-zikr mülâzımîn gediğinden mahmiye-i İslâmbol’da işlemek üzere bir aded çubukcu gediği iştirâ edip san‘at-ı mezkûreyi işlemek üzere izin verdiklerinde merkūm Aron Yahûdî dahi râzı olup bu vechile kat‘-ı münâza‘a eyledikleri tescîl ve mübâşiri çavuş kulları iltimâsıyla huzûr-ı âlîlerine i‘lâm olundu. Fî 12 min-B sene 1206