Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 705 Hüküm no: 1148 Orijinal metin no: [94b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’da Cüzzamlar Zaviyesi Şeyhi Mustafa Dede’nin yerine Ali Dede’nin tayini Ma‘rûz; Medîne-i Üsküdar hâricinde vâki‘ Cüzzâmlar Zâviyesi fukarâsından ashâb-ı arzuhâl Mehmed Dede b. Hüseyin ve Bektâş b. Mustafa ve Hasan b. Mustafa ve Hüseyin b. Veliyüddin ve Mehmed Salih b. Ali ve Ahmed b. Mehmed ve Ali b. Abdülkerim ve diğer Ali b. Mustafa ve Osman b. Ali ve Mehmed b. İbrahim ve diğer Mehmed b. Mehmed nâm kimesneler medîne-i mezbûre bâb mahkemesinde meclis-i şer‘-i hatîrde zâviye-i mezbûre şeyhi Mustafa Dede b. Ali ile karındaşı Mehmed b. Ali nâm kimesneler mahzarlarında zâviye-i mezbûrede şeyh nasbı iktizâ eyledikde fukarâ-yı mesâkînin muhtârı olan kimesne şeyh nasb u ta‘yîn ve ol dahi umûr-ı meşîhat ve zâviyeyi rü’yet ve hâsıla olan sadakāt ve avâid-i sâireyi ber-vech-i mu‘tâd fukarâ-i mezbûre beynlerinde taksîm edip ve fukarâmızdan birinin bi-hasebi’l-beşeriyye cünhası vukū‘ında li-ecli’t-tedîb ıslâh-ı nefsi’çün zâviyeden tard ve medîne-i Bursa’da kâin fukarâ-i mesâkîne mahsûs zâviyede mü’eddeb oluncaya değin ikāmet ve salâhı zâhir oldukdan sonra zâviyemize ric‘at mu‘teber nizâmımızdan iken mezbûrân Mustafa Dede ve Mehmed Dede dört seneden beri şeyhimiz olup zâviye-i mezbûre vakfından olan çayırı âhara bey‘ ve semenini umûr-ı lâzımelerine sarfla istihlâk eylediğinden gayri fukarâdan ba‘zısının zevcesini cebren tatlîk etdirdüb ve on beş yirmi guruş rüşvet ahzıyla âhara tezvîc ve hâricden ma‘lûl fukarâ geldikde illetin cüzzâm illeti değildir deyü on guruş rüşvet ahz eylemedikden sonra zâviyeye idhâl etmeyip ve sadakātdan terâküm eden meblağı ahz ve istihlâk ve hatta taraf-ı Devlet-i aliyyeden ta‘yîn buyurulan yüz çeki hatabın yirmi çekisini ekl ü bel‘ etmeleriyle mezbûrânın muhill-i nizâm harekât-ı nâ-marzıyyelerinden rahatımız bi’l-külliye meslûb olmuşdur deyü muvâcehelerinde iştikâ ve muhtâr-ı fukarâ olan hâzır bi’l-meclis Ali Dede b. İbrahim nâm kimesneyi zâviye-i mezbûrda şeyh nasb u ta‘yîn ve mezbûr Mustafa Dede meşîhatden azl ve salâhı zâhir oluncaya değin Bursa’da Cüzzâmlar Zâviyesi’nde ikāmet eylemek üzere mezbûrûndan her biri emr-i âlîş[ân]ları sudûrunu istid‘â ve istirhâm eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 17 min-B sene 1206