Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 707 Hüküm no: 1151 Orijinal metin no: [94b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali’nin kayınvalidesi Ayşe Hanım’a olan borcunu ödediği Ma‘rûz; Medîne-i Üsküdar’da Arakıyeci el-Hâc Mehmed mahallesinde sâkine mu‘arrefetü’z-zât Âişe bt. Abdullah nâm hatun medîne-i mezbûrede mahfil-i bâbda meclis-i şer‘-i hatîrde Sâbıkā dâmâdı es-Seyyid Ali b. Habib muvâcehesinde bundan akdem müteveffiye olan kızım Fatıma bt. Abdullah nâm hatun mezbûr es-Seyyid Ali’nin kırk guruş mehr-i müeccel tesmiyesiyle zevce-i medhûlün-bihâsı olup kızım mezbûre Fatıma sâlifü’z-zikr mehrini zevci mezbûr es-Seyyid Ali’nin [Ali’den] kable’l-ahz fevt olup mehr-i mezkûru zevci mezbûr es-Seyyid Ali ile bana mevrûs olmağla mehr-i mezkûrdan benim hisseme isâbet eden yirmi guruşun altı guruşunu mezbûr es-Seyyid Ali yedinden ahz ve on dört guruşu zimmetinde bâkī kalmağla bi’l-verâse taleb ederim deyü da‘vâ, ol dahi cevâbında fi’l-hakīka müteveffiye-i mezbûre Fatıma kırk guruş mehir tesmiyesiyle zevcesi olduğunu ikrâr lâkin müdde‘iye-i mezbûre târih-i i‘lâmdan bir ay mukaddem mehr-i mezkûrdan hissesine isâbet eden yirmi guruşu benden taleb ve da‘vâ esnâsında beynimize muslihûn tavassut edip müdde‘iye-i mezbûre Âişe’yi da‘vâ-yı mezkûresinden altı guruş üzerine inşâ-i akd-i sulh eylediklerinde ol dahi sulh-ı mezkûru kabûl ve bedel-i sulh olan meblağ-ı merkūm altı guruşu yedimden ahz edip mâ‘adâ on dört guruşa müte‘allika âmme-i de‘âvîden benim zimmetimi ibrâ ve ıskāt etmiş idi deyü ba‘de’d-def‘ ve’l-inkâr dâfi‘-i mezbûr es-Seyyid Ali ber-vech-i muharrer def‘ini Ahmed b. Mehmed ve Salih b. Ahmed nâm kimesneler şehâdetleriyle ber-nehc-i şer‘î muvâcehesinde isbât etmeğin mûcebiyle müdde‘iye-i mezbûre Âişe Hatun da‘vâ-yı mezkûresiyle mezbûr es-Seyyid Ali’ye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 6 min-B sene 1206