Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 711 Hüküm no: 1161 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Veliyüddin’in Seyyid İbrahim Bey’den alacaklı olduğu yolunda açtığı davaya itibar edilmediği Ma‘rûz; Vilâyet-i Anadolu’da Bayburd kazâsı ahâlisinden olup mahmiye-i İslâmbol’da Mercan Çarşısı’nda sâkin sâhib-i arzuhâl Tâcir Veliyüddin b. Veli medîne-i Üsküdar’da meclis-i şer‘-i hatîrde arzuhâlde ismi mezkûr es-Seyyid İbrahim Bey b. Salih tarafından ber-vech-i âtî vekîl olduğu Osman b. Abdullah ve Süleyman b. Mehmed nâm kimesneler şehâdetleriyle sâbit olan es-Seyyid Mustafa b. İbrahim mahzarında müvekkil-i mezbûr es-Seyyid İbrahim bin yüz doksan dokuz senesi vilâyet-i Anadolu’da Şebinkarahisârı voyvodası iken ticâret tarîkiyle ol târihde mârrü’z-zikr Şebinkarahisârı’nda misâfiren sâkin olmamla siz taşradan gelip ziyâde ticâret edermişsiz deyü beni bi-gayrı hakkın ahz ü habs ve tahlîs içün cerîme nâmıyla nakden yedi yüz on beş guruşumu ahz etmekle ben dahi meblağ-ı merkūm yedi yüz on beş guruşu bin iki yüz beş senesi Zilhicce’sinin altıncı günü mahrûse-i Galata Mahkemesi’nde meclis-i şer‘de hâkimü’l-vakt efendi huzûrunda müvekkil-i mezbûr es-Seyyid İbrahim Bey’den taleb ve da‘vâ eylediğimde beynimize muslihûn tavassut edip beni da‘vâ-yı mezkûremden yüz doksan guruş bedel-i makbûza an-inkârin mezbûr es-Seyyid İbrahim Bey ile sulh eylediklerinde ben dahi sulhu kabûl ve mâ‘adâ mutâlebesinden zimmetini ibrâ etmiş idim lâkin sulh-ı mezkûr ol târihde bana ba‘zı kimesnelerin ibrâm ve ilhâhları ile olup ben dahi sulh-ı mezkûra nâdim olmamla mâ‘adâsı olan beş yüz yirmi beş guruşu taleb ederim deyü takrîr-i meşrûhu üzere tasaddî eylediği da‘vâsına iltifat olunmadığı mübâşiri çavuş kulları iltimâsıyla huzûr-ı âlîlerine i‘lâm olundu. Fî 18 min-B sene 1206