Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 713 Hüküm no: 1164 Orijinal metin no: [95b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Âkıle Hanım’ın Mustafa Ağa’ya hibe ettiği şalı geri almasının meşru olmadığı Ma‘rûz; Medîne-i Üsküdar’da Kefçe mahallesi sâkinelerinden Şerife Âkıle Hanım bt. es-Seyyid Halil Efendi tarafından ber-vech-i âtî vekîl olduğu zâtını ârifân Bostanî Mustafa Ağa b. Eyüb ve el-Hâc Osman b. Mehmed nâm kimesneler şehâdetleriyle sâbit olan Bostanî Mehmed Ağa b. Ali nâm kimesne medîne-i mezbûrede mahfil-i bâbda meclis-i şer‘-i hatîrde Mustafa Ağa b. Abdullah mahzarında müvekkilem mezbûre Şerife Âkıle Hanım zevc-i sâbıkı gāib ani’l-meclis Abdülcelil Efendi ile zevciyet beynlerinde kāime iken mezbûr Mustafa Ağa gāib-i mezbûrun hizmetinde olup müvekkilem mezbûre emlâkinden yüz elli guruş kıymetli turuncu bir Lahor[î] şalını mezbûr Mustafa Ağa’ya hibe-i sahîha ile hibe ve teslîm, ol dahi ittihâb ve kabûl ve hâlâ aynı yedinde mevcûde olup lâkin müvekkilem mezbûre hibesinden rücû‘ birle şal-ı mezkûru müvekkilem mezbûre içün bana teslîme mezbûr Mustafa Ağa’ya tenbîh olunmak matlûbumdur deyü da‘vâ ol dahi cevâbında zikr olunan şalı ber-vech-i muharrer müvekkile-i mezbûre yedinden ahz eylediğini ikrâr lâkin âhara bey‘le istihlâk etmiş idim deyü hâlâ aynı yedinde mevcûd olduğunu inkâr etmeğin müdde‘î-i vekîl-i mezbûr ber-minvâl-i muharrer müdde‘âsını beyândan izhâr-ı acz edip talebiyle mezbûr Mustafa Ağa gıbbe’t-tahlîfi’ş-şer‘î mûcebiyle müdde‘î-i vekîl-i mezbûr da‘vâ-yı mezkûresiyle mezbûr Mustafa Ağa’ya bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 25 min-B sene 1206