Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 713 Hüküm no: 1165 Orijinal metin no: [95b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın borcunu ödemesi Ma‘rûz; Medîne-i Üsküdar’da Sipâhpazarı Sûku’nda Oturakcı es-Seyyid İbrahim b. Mustafa nâm kimesne medîne-i mezbûrede mahfil-i bâbda meclis-i şer‘-i hatîrde mu‘arrefetü’z-zât Âişe bt. Mustafa nâm hatun muvâcehesinde mezbûre Âişe Hatun târih-i i‘lâmdan beş sene mukaddem yedimden iştirâ ve kabz eylediği beynimizde ma‘lûm eşyâ-i mütenevvi‘a semeninden yetmiş beş guruş hakkımın yirmi guruşunu yedinden ahz ve yirmi beş guruşunu rızâm ile tenzîl, mâ‘adâ otuz guruş zimmetinde hakkım bâkī kalıp hattâ meblağ-ı merkūm otuz guruş bana deyni olduğunu işbu bir kıt‘a temessüğü dahi yedime i‘tâ etmekle taleb ederim deyü da‘vâ, ol dahi cevâbında müdde‘î-i mezbûra cihet-i mezkûreden otuz guruş deyni olup ber-vech-i muharrer temessük i‘tâsını ikrâr lâkin on dört guruşu müdde‘î-i mezbûra edâ ve teslîm edip ancak on altı guruşu zimmetimde bâkī kalmış idi deyü ba‘de’d-def‘ ve’l-inkâr mezbûre Âişe hatun ber-vech-i muharrer eylediği def‘ini beyândan izhâr-ı acz edip talebiyle müdde‘î-i mezbûr es-Seyyid İbrahim gıbbe’t-tahlîfi’ş-şer‘î mûcebiyle meblağ-ı bâkī-i merkūm otuz guruşu müdde‘î-i mezbûra edâ ve teslîme mezbûre Âişe Hatun’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. [Fî 25 min-B sene 1206]