Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 714 Hüküm no: 1166 Orijinal metin no: [95b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Ahmed’den muhâla‘a yoluyla boşanan Hatice Hanım’ın mehir ve nafakasını almış olduğu Ma‘rûz; Medîne-i Üsküdar’a muzâfe Adalar nâhiyesine tâbi‘ Viran karyesinde sâkine ve zâtı mu‘arrefe Hadice bt. İsmail nâm hatun medîne-i mezbûrede mahfil-i bâbda meclis-i şer‘-i hatîrde zevc-i mutallıkı Ahmed b. Mehmed mahzarında mezbûr Ahmed yüz guruş mehr-i müeccel tesmiyesiyle zevcim olup târih-i i‘lâmdan on dört gün mukaddem beni tatlîk etmekle zimmetinde mütekarrir ve ma‘kūdun-aleyh olan mehr-i mezkûrum yüz guruş ile hîn-i zifâfda ebeveyni ve akrabâsına vermek içün yedine teslîm eylediğim beheri yirmi beş guruş kıymetli dört bohca kıymetlerinden yüz guruş ki cem‘an iki yüz guruş ile bakıye-i nafakamı zevc-i mutallıkım mezbûr Ahmed’den taleb ederim deyü da‘vâ ve mezbûr Ahmed cevâbında müdde‘iye-i mezbûre yüz guruş mehr ile zevcesi olduğunu ikrâr lâkin târih-i mezkûrda vâlidesi diğer Hadice Hatun’a müdde‘iye-i mezbûre tarafından sâbitü’l-vekâle vekîli olup yüz guruş mehri ve nafaka-i iddet-i ma‘lûmesi ve meûnet-i süknâsı dahi müvekkilesi üzerine olmak üzere benimle hul‘ olup hukūk-ı zevciyete ve sâire müte‘allika âmme-i de‘âvîden benim zimmetimi ibrâ etmiş idi deyü bir kıt‘a muhâla‘a hücceti ibrâzıyla ba‘de’d-def‘ ve’l-inkâr mezbûr Ahmed def‘ini es-Seyyid Mustafa b. Hasan ve Mehmed b. Yusuf nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle müdde‘iye-i mezbûre husûs-ı mezkûr içün zevc-i mutallıkı mezbûr Ahmed’e bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 25 min-C sene 1206