Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 715 Hüküm no: 1167 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Mehmed’in kefaletten doğan borcunu ödemesi Ma‘rûz; Medîne-i Üsküdar’da Dârü’s-sa‘âdeti’ş-şerîfe Ağası Çeşmesi kurbünde mütemekkin Bakkāl Sava v. Anaştaş nâm zimmî medîne-i Üsküdar’da mahfil-i bâbda meclis-i şer‘-i hatîrde Ömer b. Mehmed nâm kimesne mahzarında târih-i i‘lâmdan altı ay mukaddem vefât eden Feyzullah nâm kimesne zimmetinde cihet-i karz-ı şer‘îden kırk dokuz guruş alacak hakkım olup müteveffâ-yı mezbûr Feyzullah’ın vefâtından bir buçuk sene mukaddem hayatında meblağ-ı merkūm kırk dokuz guruşu taleb eylediğimde meblağ-ı merkūmu mezbûr Feyzullah vermezse ben veririm deyü tarafeynden bi’l-emr ve’l-kabûl mezkûr Ömer kefîl olup mezbûr Feyzullah kable’l-edâ vefât etmekle mezbûr Ömer’in kefâletine binâen meblağ-ı merkūm kırk dokuz guruşu taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını udûlden Mehmed Şûhî Efendi b. Ali ve Ömer b. İbrahim nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle meblağ-ı merkūm kırk dokuz guruşu müdde‘î-i merkūma edâ ve teslîme mezbûr Ömer’e bi-hükmi’l-kefâle şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 16 min-B sene 1206