Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 715 Hüküm no: 1168 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf Serkiz v. Karabet’in borcunu ödemesi Ma‘rûz; Medîne-i Üsküdar’da Kefçe mahallesinde sâkine Fatıma bt. el-Hâc Mustafa nâm hatun tarafından vekîl-i müseccel-i şer‘îsi ve hâlâ zevci Süleyman Ağa b. Ömer medîne-i mezbûrede mahfil-i bâbda meclis-i şer‘-i hatîrde Haffâf Serkiz v. Karabet muvâcehesinde merkūm Serkiz zimmî bundan akdem Yenimahalle’de vâki‘ mutasarrıf olduğu ma‘lûmü’l-hudûd ve’l-müştemilât bir bâb menzil istiğlâliyle müvekkilem mezbûrenin yedinden istidâne ve kabz ve umûruna sarfla istihlâk eylediği beş yüz guruş ve yine mahalle-i mezbûrede vâki‘ menzil-i mezkûr ittisâlinde kâin ma‘lûmü’l-hudûd mâlik olduğu bir kıt‘a bağçe istiğlâliyle iki yüz guruş ve yine benim mâlımdan ve yedimden istidâne ve kabz ve umûruna sarfla istihlâk eylediği işbu yedimde olan bir kıt‘a deyn temessüğü nâtık olduğu üzere dört yüz guruş ki cem‘an bin yüz guruş benim ile zevcem müvekkilem mezbûrenin merkūm Serkiz zimmetinde alacak hakkımız olmağla asâletenve vekâleten taleb ederim deyü ba‘de’d-da‘vâ ve’l-istintâk ve’l-ikrâr mûcebiyle menzil-i mezkûr ile bağçe-i mezkûreyi rehniyetden fekke müvekkilesine izâfetle vekîl-i mezbûr Süleyman Ağa’ya ve deyn-i meblağ-ı mecmû‘-ı merkūm bin yüz guruşu müdde‘î-i vekîl-i mezbûra edâ ve teslîme merkūm Serkiz zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 27 min-B sene 1206