Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 718 Hüküm no: 1174 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bekçi Hurşid b. Yusuf’un bulunduğu mahalleden çıkarılması Ma‘rûz; Medîne-i Üsküdar’da [Hacce] Hatun mahallesinde Köle Emini Konağı demekle meşhûr menzilde Bekci Hurşid b. Yusuf kendi hâlinde ırzıyla mukayyed olmayıp dâimâ sekerân olarak mahalle-i mezbûrede geşt ü güzâr ve kendiye nâ-mahrem ve ecnebî olan fevâhiş makūlesi avratları bekci olduğu konakda ve kendi menzilinde bî-muhâ[ba] alenen iskân etdirip bu misillü fezâhata cesâreti olduğundan nâşi bundan akdem bi’d-defa‘ât kendiye nush ü pend eylediğimizde mütenassıh olmayıp ef‘âl-i nâ-marzıyesinde ısrâr ve yine târih-i i‘lâmdan bir haf[ta] mukaddem gece ile yine sekerân olup fevâhiş makūlesi avrat ahz ve icrâ-yı fısk içün cem‘ olduklarını mahallesi ahâlisi ihbâr ve ahz olunmalarını iltimâs etmeleriyle ma‘rifet-i şer‘ ve Büyükkolluk Odabaşısı Abdurrahman ve ahâli-i mahalle ile mâ‘an varılıp mezbûr Hurşid’i ahz esnâsında bir-takrîb avratlarını mezbûr Hurşid ol gece âhar menzilde ihfâ eylediğini ve ancak kendi sekerân olduğunu mahallesi İmâmı es-Seyyid Mehmed Said Efendi b. Ahmed ve Mehmed Sadık Efendi b. Hasan ve İsmail Efendi b. Sunullah ve el-Hâc Halil [Ağa] b. Ali ve Müezzin Molla Süleyman b. Abdullah ve Hafız es-Seyyid Bekir Efendi b. es-Seyyid Bekir ve Molla Halil b. Ahmed ve Selim b. Hüseyin ve Ömer b. Mehmed ve Ahmed b. Mehmed ve Ahmed Ağa b. Abdullah ve Mehmed b. Ahmed ve Nimetullah b. Mehmed nâm kimesneler târih-i i‘lâm günü bi-ecma‘ihim meclis-i şer‘de ihbâr ve fî-mâ ba‘d mezbûr Hurşid’den bi’l-külliye emniyetimiz meslûb olmağla mahalle-i mezbûrede iskân etmeyip ihrâc olunmak bâbında fermân-ı âlîleri sudûrunu ahâli-i mezbûreden her biri istid‘â eyledikleri bi’l-iltimâs huzûr-ı âlîlerine i‘lâm olundu. Fî 27 min-Receb sene 1206