Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 718 Hüküm no: 1175 Orijinal metin no: [96b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeğen Ali Paşa’nın inşa ettiği mevlevihaneye vakfettiği hanın kira gelirlerinin kullanılması hakkındaki vakfiye şartlarında değişiklik yaptığı Ma‘rûz; Medîne-i Üsküdar’da Rum Mehmedpaşa mahallesinde vâki‘ inşâ oluna[n] mevlevîhânenin vâkıfı ve mütevellîsi eş-Şeyh Numan Beyzâde b. el-merhûm Yeğen Ali Paşa medîne-i mezbûre bâb mahkemesinde meclis-i şer‘-i hatîrde bast-ı kelâm edip işbu yedimde olan bir kıt‘a mu‘âyene ve müşâhede [olunan] vakfiye-i ma‘mûlün-bihâmda münderic olduğu vech üzere vilâyet-i Anadolu’da Aydın Güzelhisârı’nda Ramazanpaşa mahallesinde Çırapazarı kurbünde kâin bir tarafdan Cihanzâde Medresesi ve bir tarafdan ba‘zan Kurşunlu Mekteb ve ba‘zan dekâkin ve bir tarafdan ba‘zan Hacı Abdülkerim ve ba‘zan Kâtib Ahmed Efendi hâneleri ve taraf-ı râbi‘i tarîk-i âm ile mahdûd arsasının merhûm Ramazanpaşa Vakfı’na beher şehr ikişer guruş mukāta‘a-i kadîmeli büyût-ı adîdeyi ve müştemilât-ı sâireyi hâvî ebniyesi mülk, müfrez bir bâb hanımı vakf ve gallesini binâ eylediğim sâlifü’z-zikr mevlevîhâneme şart ve ta‘yîn edip hân-ı mezkûru icâreteyn ile âhara îcâr olunmasına ta‘arruz olunmayıp derûn-ı vakfiyede ale’l-ıtlâk zikr ve vakf-ı mezkûrumun tebdîl ve tağyîri yedimde ve meşiyetimde olup hân-ı mezkûrda ale’l-ıtlâk şartımdan rücû‘ ve icâreteyn-i misleteyn ile âhara îcâr olunması her vechile cânib-i vakfa enfa‘ ve ahrâ olmağın hakīkat-i hâle vukūf-ı tammı olan bî-garaz Müslimînden istihbâr ve habereleri zabt ve bir kıt‘a emr-i âlî-şân sudûruyla hân-ı mevkūf-ı mezkûr icâreteyn ile âhara îcâr olunması matlûbumdur dedikde li-ecli’l-ihbâr meclis-i şer‘a hâzırân olan eş-Şeyh Mehmed Sadık Efendi b. el-Hâc Ömer ve eş-Şeyh es-Seyyid Mehmed Efendi b. Mehmed ve Derviş Hasan b. Mustafa ve Abdullah b. Hasan ve Derviş Ali b. Mehmed Emin nâm kimesnelerden istihbâr olunduklarında fi’l-hakīka hâl vâkıf-ı mûmâ-ileyhin takrîr-i meşrûhu üzere olduğunu ihbârlarıyla zâhir ve şartından rücû‘u dahi meşrû‘ olmağın hân-ı mezkûrun icâreteyn ile âhara îcâr olunmak bâbında tuğrâ-yı garrâ ile mu‘anven ve müveşşah emr-i âlîleri sudûrunu istid‘â eylediği bi’l-iltimâs huzûr-ı âlîlerine i‘lâm olundu. Fî 22 min-Receb sene 1206