Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 719 Hüküm no: 1177 Orijinal metin no: [96b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef v. David’in borcunu ödemesi Ma‘rûz; Medîne-i Üsküdar’da Rum Mehmedpaşa mahallesinde sâkin Mehmed Ârif b. Abdullah nâm mühtedî medîne-i mezbûre bâb mahkemesinde meclis-i şer‘-i hatîrde Kuzguncuk karyesi mütemekkinlerinden Yasef v. David nâm Yahûdî muvâcehesinde bundan akdem merkūm Yasef yedine idâne ve teslîm, ol dahi istidâne ve kabz ve umûruna sarfla istihlâk eylediği iki bin guruş deyni olup hattâ zevcesi gāibetü an[i’l-meclis] Rukan Yahûdîye karye-i mezbûrede vâki‘ yalı ta‘bîr olunur bir bâb menzili rehniyetle tekeffül etmiş idi deyü da‘vâ, merkūm Yasef cevâbında bin iki yüz beş senesi Zilhicce’si gurresine gelince yirmi altı ay mukaddem iki bin altı yüz guruş istidâne eylediğimden sonra gurre-i merkūmede müdde‘î-i mezbûr yedine def‘ ( ) altı yüz guruş ve bilâ-devr-i murâbaha nâmıyla bir def‘a dört yüz yetmiş altı guruş seksen akçe ve bir def‘a dahi yüz kırk guruş ki cem‘an altı yüz on altı guruş seksen akçe medfû‘um olmağla müdde‘î-i mezbûrun müdde‘âsı olan meblağ-ı merkūm iki bin guruşdan meblağ-ı mezkûr altı yüz on altı guruş seksen akçe fürû-nihâde olundukda bâkī ancak bin üç yüz seksen üç guruş kırk akçe müdde‘î-i mezbûrun zimmetinde hakkı bâkī kalmış idi deyü ba‘de’d-def‘ ve’l-inkâr dâfi‘-i merkūm Yasef eylediği def‘ini isbât edemeyip müddet-i mehl-i şer‘î tamam olmağın talebiyle müdde‘î-i mezbûr gıbbe’t-tahlîfi’ş-şer‘î mûcebiyle meblağ-ı mecmû‘-ı merkūm iki bin guruşu müdde‘î-i mezbûr Mehmed Ârif’e edâ ve teslîme merkūm Yasef Yahûdî’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 7 min-Ş sene 1206