Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 721 Hüküm no: 1179 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mudanyalı İstori’nin Çengelköylü Yorgi’deki alacaklarını tahsil ettiği Ma‘rûz; Mudanya kazâsı re‘âyâsından İstori v. Kostanti nâm zimmî medîne-i Üsküdar’da mahfil-i bâbda meclis-i şer‘-i hatîrde medîne-i mezbûreye tâbi‘ Çenger karyesi mütemekkinlerinden Yorgi v. Apostol nâm zimmî muvâcehesinde işbu târih-i i‘lâm senesi Safer’inin on dördüncü günü târihiyle müverrah bâ-i‘lâm-ı mahkûmün-bih hamr ve arak semeninden dokuz yüz kırk üç guruş alacağım merkūm Yorgi zimmetinde bâkī kalmağla hâlâ taleb ederim deyü da‘vâ ve merkūm Yorgi zimmî cevâbında cihet-i merkūmeden ol-mikdâr deyni olduğunu ikrâr lâkin târih-i i‘lâmdan üç ay mukaddem Medîne-i mezbûreye tâbi‘ Kuzguncuk karyesinde mütemekkin Petro zimmî menzilinde bâ-tavassut-ı muslihîn benim ile sekiz yüz guruş bedel-i makbûza sulh ve ziyâde müdde‘âsı olan yüz kırk üç guruşa müte‘allika âmme-i de‘âvîden zimmetimi ibrâ, ben dahi ibrâsını kabûl etmemle zimmetim berî’e olmuş idi deyü ba‘de’d-def‘ ve’l-inkâr dâfi‘-i merkūm Yorgi ber-vech-i muharrer eylediği def‘ini lede’t-tezkiye udûlden olan Yorgi v. Nikola ve Petro v. Dimitri nâm zimmîler şehâdetleriyle vech-i şer‘î üzere müdde‘î-i merkūm İstori zimmî muvâcehesinde isbât etmeğin mûcebiyle müdde‘î-i mesfûr İstori zimmî husûs-ı merkūmda merkūm Yorgi zimmîye bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 8 min-Ş sene 1206