Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 722 Hüküm no: 1182 Orijinal metin no: [97a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’daki Cüzzamlar Zaviyesi’nde bulunan cami‘-i şerifin imamlığına Molla Ahmed’in tayini Ma‘rûz; İşbu arzuhâle nazar ve muktezâ-yı şer‘îsi i‘lâm olunmak bâbında bâlâsı sahh-ı mekârim ile mu‘anven sâdır olan emr-i âlîlerine imtisâlen medîne-i Üsküdar hâricinde vâki‘ Cüzzâmlar fukarâsından ashâb-ı arzuhâl Şeyh Ali b. İbrahim ve Bektaş b. Mustafa ve diğer Ali b. Mustafa ve Mehmed b. Mehmed ve diğer Mehmed b. Hüseyin ve Ahmed b. Mehmed ve Osman b. Ali ve diğer Ali b. Abdülkerim ve diğer Mehmed b. İbrahim ve Mehmed Salih b. Ali ve Ali b. Veliyüddin ve Hasan b. Mustafa nâm kimesneler medîne-i mezbûrede mahfil-i bâbda meclis-i şer‘-i hatîrde her biri ifâde-i merâm edip bundan akdem bâ-emr-i âlî Bursa’da sâkin Cüzzâmlar Zâviyesi’ne nefy ve hâlâ ikāmet üzere olan gāib ani’l-beled Mustafa Dede b. Halil nâm kimesne Üsküdar Zâviyesi’nde vâki‘ câmi‘-i şerîfde ber-vech-i hasbî imâm ve hatîb olup hâlâ üzerinde olduğu işbu arzuhâl hâmişinde der-kenârı nâtık olmağla lâkin gāib-i mezbûrun hizmet-i lâzımesi mu‘attal olduğundan gayri cüzzâm illetine mübtelâ ve illet-i mezkûreden nâşi ayağında cerh-i sâyili olup müstekreh ve şer‘an iktidâsı câiz olmamağla ciheteyn-i mezkûreteyn gāib-i mezbûr Mustafa’nın ref‘inden, erbâb-ı istihkākdan hâzır bi’l-meclis Molla Ahmed b. Mustafa’ya tevcîhini istid‘â etmeleriyle ciheteyn-i mezkûreteyn gāib-i mezbûr Mustafa’nın ref‘inden mezbûr Molla Ahmed’e tevcîhi re’y-i âlîlerine menût olduğu imtisâlen-li’l-emri’l-âlî huzûr-ı âlîlerine i‘lâm olundu. Fî 13 min-Ş sene 1206