Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 723 Hüküm no: 1183 Orijinal metin no: [97a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Anderya v. Todori’nin kefalete bağlandığı Ma‘rûz; Medîne-i Üsküdar’da Balaban İskelesi kurbünde mütemekkin Yağcı Mardıros v. İstirati nâm zimmî mahfil-i bâbda meclis-i şer‘-i hatîrde Yağcı Anderya v. Todori nâm zimmî muvâcehesinde târih-i i‘lâmdan bir ay mukaddem merkūm Anderya zimmî gāib ani’l-meclis Kalyoncu Deli Hasan nâm kimesneye elli guruş va‘ad edip benim içün katlile ihlâk eyle deyü iğrâ etmekle mûcibini merkūm Anderya zimmîden taleb ederim deyü da‘vâya tasaddî eyledikde ol dahi inkâr etmekle beynlerinde ba‘de-vukū‘ı’l-münâza‘a bâ-tavassut-ı muslihîn müdde‘î-i merkūm tasaddî eylediği da‘vâsından meccânen fâriğ ve husûs-ı merkūma müte‘allika âmme-i de‘âvîden merkūm Anderya zimmînin zimmetini ibrâ ve ıskāt ol dahi ber-vech-i muharrer ibrâsını kabûl eyledikden sonra fî-mâ ba‘d merkūm Anderya zimmîden bu misillü ef‘âl-i şenî‘a sudûr eder ise nefsine ve hîn-i mutâlebede huzûr-ı hükkâma ihzârına yağcı ustalarından hâzır bi’l-meclis Foti v. Polihron ve İstırati v. Anderya nâm zimmîlerden her biri ta‘ahhüd tekeffülleri tescîl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 6 min-Ş sene 1206