Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 724 Hüküm no: 1186 Orijinal metin no: [97b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Mehmed Kadri Efendi’nin biriken kira borçlarını ödeyip kiracısı olduğu iki dükkânı tahliye edeceği Ma‘rûz; Medîne-i Üsküdar’da Gerede mahallesinde sâkine Hadice bt. İbrahim nâm hatun tarafından ber-vech-i âtî vekîl olduğu zât-ı mezbûreyi bi’l-ma‘rifeti’ş-şer‘iye ârifân Hafız Mehmed Kadri Efendi b. el-Hâc Hüseyin Efendi ve İsmail Ağa b. Hüseyin nâm kimesneler şehâdetleriyle sâbit olan zâtı mu‘arrefe Zahire bt. Abdullah nâm hatun meclis-i şer‘-i hatîrde es-Seyyid Ebûbekir b. Hasan mahzarında mezbûr es-Seyyid Ebûbekir müvekkile-i mezbûrenin medîne-i mezbûrede Doğancılar nâm mahâlde vâki‘ ma‘lûmü’l-hudûd iki bâb dükkânında beher mah üçer buçuk guruş ücret ile müsteciri olup bin iki yüz altı senesi Saferi’l-hayr’ın gurresinden işbu târih-i i‘lâm şehri gāyetine gelince yedi ayda dekâkin-i mezkûr icâresinden zimmetinde müctemi‘a olan yirmi dört buçuk guruş ile icâre-i mezkûreyi şehr-i âtî gurresinden fesh ve dekâkin-i mezkûru tahliye ve müvekkile-i mezbûreye teslîme tenbîh olunmak bi’l-vekâle matlûbumdur deyü da‘vâ etdikde ol dahi ikrâr ü i‘tirâf etmeğin mûcebiyle meblağ-ı merkūm yirmi dört buçuk guruşu müvekkile-i mezbûre Hadice Hatun’a teslîme ba‘de’t-tenbîh dekâkin-i mezkûru gāyet-i şehr-i mezkûrda tahliye ve müvekkile-i mezbûreye teslîme ta‘ahhüd eylediğinde ol dahi râzı olup bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 18 min-Ş sene 1206