Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 725 Hüküm no: 1189 Orijinal metin no: [97b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ebubekir Efendi’nin borcunu ödemesi Ma‘rûz; Mahmiye-i İslâmbol’da Sorguçcular Hân’ı kurbünde Kapamacı Serope v. Delvet nâm zimmî medîne-i Üsküdar’da mahfil-i bâbda meclis-i şer‘-i hatîrde es-Seyyid Ebûbekir Ağa b. es-Seyyid Eyüb mahzarında mezbûr es-Seyyid Ebûbekir Ağa târih-i i‘lâmdan on bir ay mukaddem beheri kırkar guruşa olmak üzere yedimden iştirâ ve kabz eylediği sevâî entari semenlerinden seksen guruş zimmetinde hakkım olmağla taleb ederim deyü da‘vâ ol dahi cevâbında fi’l-hakīka müdde‘î-i merkūm yedinden iki sevâî entari iştirâsını ikrâr lâkin beherini otuz beşer guruşa iştirâ etmiş idim deyü ziyâdeye iştirâsını inkâr etmeğin müdde‘î-i merkūm ber-vech-i muharrer ziyâde müdde‘âsı olan on guruşu isbâtdan izhâr-ı acz edip talebiyle mezbûr es-Seyyid Ebûbekir Ağa’ya yemîn teklif olundukda yemînden nükûlüyle sâbit olmağla mûcebiyle müdde‘î-i merkūm seksen guruşu müdde‘î-i merkūm Serope zimmîye edâ ve teslîme mezbûr es-Seyyid Ebûbekir Ağa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî 14 min-Ş sene 1206