Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 726 Hüküm no: 1190 Orijinal metin no: [97b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa b. Ömer’in borcunu ödediği Ma‘rûz; Saray-ı Cedîd-i Âmire’de bevvâb-ı Bâb-ı hümâyûn neferâtından iken bundan akdem fevt olan Zamaneoğlu Mehmed b. Ali’nin sulbî kebîr oğlu sâhib-i arzuhâl Bostanî Mehmed Salih nâm kimesne medîne-i Üsküdar Bâb Mahkemesi’nde meclis-i şer‘-i hatîrde derûn-ı arzuhâlde mezkûr Süleyman Ağa b. Ömer mahzarında babam müteveffâ-yı mezbûr Mehmed’in bevvâb esâmîlerinden altı akçe yevmiyesinin güzeşte on dört kıst ulûfesi mezbûr Süleyman Ağa ocağımız zâbiti olmağla ulûfemizi kabz edegeldiğine binâen on dört kıst ulûfemi alıvermek matlûbumuzdur deyü ba‘de’d-da‘vâ ve’l-istintâk merkūm Süleyman Ağa cevâbında matlûb olan on dört kıstın dört kıstı hâlâ Hazîne-i hümâyûnda ve yedi kıstı gāib ani’l-meclis Külahlıoğlu Osman nâm kimesnenin zimmetinde ve bâkī üç kıstı benim zimmetimdedir deyü eylediği takrîrini mezbûr Bostanî Mehmed Salih tasdîk ve mezbûr Süleyman Ağa’nın makbûzu olan üç kıstı tamamen bana def‘ u teslîm ben dahi yedinden ahz ü kabz edip bi’l-cümle husûs-ı merkūma müte‘allika âmme-i de‘âvîden mezbûr Süleyman Ağa’nın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 14 min-C sene 1206