Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 726 Hüküm no: 1191 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskici Serkiz v. Karabet’in borcunu ödemesi Ma‘rûz; Mahmiye-i İslâmbol’da Ayasofya-i kebîr kurbünde sâkin sâhib-i arzuhâl Mehmed b. Ali medîne-i Üsküdar’da mahfil-i bâbda meclis-i şer‘-i hatîrde derûn-ı arzuhâlde ismi mezkûr Eskici Serkiz v. Karabet zimmî muvâcehesinde merkūm Serkiz zimmî bin iki yüz dört senesi Zilka‘deti’ş-şerîfe gurresi târihiyle müverrah yedimde olan bir kıt‘a temessük mantûkunca iktirâz ve kabz ve umûruna sarfla istihlâk eylediği seksen iki guruş ve en‘âm-ı şerîf bahâsından dahi on guruş ki cem‘an doksan iki guruş hakkımı taleb ederim deyü da‘vâ ve merkūm Serkiz zimmî cevâbında müdde‘î-i mezbûra ancak seksen iki guruş deyni olduğunu ikrâr ve en‘âm-ı şerîf bahâsından on guruşu inkâr etmeğin müdde‘î-i mezbûr ber-vech-i muharrer ziyâde müdde‘âsını beyâna kādir olamayıp talebiyle merkūm Serkiz zimmî gıbbe’t-tahlîfi’ş-şer‘î mûcebiyle müdde‘î-i mezbûr ziyâde müdde‘âsı’çün merkūm Serkiz zimmîye bilâ-beyyine mu‘ârazadan ba‘de’l-men‘ mertebe-i ikrârı olan seksen iki guruşun edâsıyla merkūm Serkiz zimmî ilzâm olunduğu rızâlarıyla Üsküdar Mahkemesi’nde tescîl ve mübâşiri es-Seyyid Ali Çavuş kulları iltimâsıyla huzûr-ı âlîlerine i‘lâm olundu. Fî 27 min-Ş sene 1206