Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 728 Hüküm no: 1195 Orijinal metin no: [98a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nimetullah Hanım’ın küçük yaşta nikâhlanıp evlilik yaşamadan boşandığı kocasıyla mehir konusunda anlaştığı Ma‘rûz; Medîne-i Üsküdar’da Turbali mahallesinde sâkine mu‘arrefetü’z-zât Nimetullah bt. Mehmed Emin nâm hatun medîne-i mezbûrede mahfil-i bâbda meclis-i şer‘-i hatîrde zevc-i Mustafa [sâ]bıkı Mustafa b. Ahmed nâm kimesne tarafından ber-vech-i âtî tasdîka vekîli olan es-Seyyid Ahmed b. İsmail mahzarında ben hâl-i sıgārımda müvekkil-i mezbûr Mustafa’nın elli guruş mehr-i müeccel tesmiyesiyle zevce-i gayri medhûlün-bihâsı iken târih-i i‘lâmdan yedi sene mukaddem müvekkil-i mezbûr kezâlik hâl-i sıgārımda beni tatlîk etmekle zimmetinde mütekarrir ve ma‘kūdun-aleyh olan mârrü’z-zikr elli guruş mehrimin nısfı olup şer‘an lâzım gelen yirmi beş guruş hakkımı müvekkil-i mezbûr Mustafa’dan taleb ederim deyü müdde‘iye-i mezbûre ber-vech-i muharrer eylediği da‘vâsından bâ-tavassut-ı muslihîn on beş guruş bedel-i makbûza sulh olup ziyâde müdde‘âsı olan on guruşa ve hukūk-ı zevciyete müte‘allika âmme-i de‘âvîden zevc-i sâbıkı müvekkil-i mezbûr Mustafa’nın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 25 min-Ş sene 1206