Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 728 Hüküm no: 1196 Orijinal metin no: [98a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mikail v. Bogos’un verâsetinin taksiminde çıkan ihtilafın giderildiği Ma‘rûz; Medîne-i Üsküdar’da Selami mahallesinde mütemekkin iken bundan akdem hâlik olan Mikâil v. Bogos nâm zimmînin verâseti zevce-i metrûkesi Gül bt. Avadik Nasrâniye ile sulbiye kebîre kızı Turfanda ve sulbî kebîr evlâdları Karabet ve Rapail zimmîlere münhasıra ve tashîh meselesi kırk sehmden beşer [beş] sehmi zevcesi merkūmeye ve yedi sehmi kızı merkūmeye ve on dörder sehmden yirmi sekiz sehmi oğulları merkūmâna isâbeti ba‘de’t-tahakkuk arzuhâlde mezkûr Karabet asâleten ve merkūm Rapail tarafından vekîl olduğu Yakub Ağa b. İsmail ve el-Hâc Ahmed b. Hüseyin nâm kimesneler şehâdetleriyle sâbit olan hâletesi Norik bt. David nâm Nasrâniye vekâleten bi’t-terâzî medîne-i mezbûrede mahfil-i bâbda meclis-i şer‘-i hatîrde arzuhâl eden mu‘arrefetü’ş-şahs zevce-i merkūme Gül Nasrâniye muvâcehesinde babamız hâlik-i merkūm helâkinden üç gün mukaddem zevcesi merkūme Gül Nasrâniye’ye nakden def‘ u teslîm eylediği bin iki yüz guruş, terekesinden olup tashîh-i merkūm üzere bize mevrûs olmağla hisse-i irsiyemize isâbet eden dokuz yüz kırk guruşu zevce-i merkūme Gül Nasrâniye’den asâleten ve vekâleten taleb ederim deyü da‘vâ ol dahi cevâbında işbu sene-i mübâreke Saferi’l-hayr’ının yirmi altıncı günü ve sene-i mezbûre Cumâdelâhir’inin yirmi dördüncü günü târihleriyle müverrah yedime i‘tâ olunan iki kıt‘a i‘lâm-ı şer‘î nâtık olduğu üzere müdde‘iyân-ı merkūmân Karabet ve Rapail zimmîler babaları hâlik-i merkūmun terekesinden mîrâs mutâlebe etdiklerinde bî-vech-i şer‘î mu‘ârazadan men‘ olunmuş idi deyü bi’l-cümle takrîr-i meşrûhuna mutâbık ve târihân-ı merkūmân ile müverrah iki kıt‘a i‘lâm ibrâzıyla ba‘de’d-def‘ ve’l-inkâr merkūme Gül Nasrâniye mazmûn-ı i‘lâmları es-Seyyid Mustafa b. Hasan nâm kimesne ile Karabet v. Avadik nâm zimmî şehâdetleriyle vech-i şer‘î üzere muvâcehelerinde isbât etmeğin mûcebiyle müdde‘iyân-ı merkūmân kemâ-fi’l-evvel bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 26 min-Ş sene 1206