Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 731 Hüküm no: 1202 Orijinal metin no: [98b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yedekcizade Mehmed Tahir Efendi’nin borcunu ödemesi Ma‘rûz; Mahmiye-i İslâmbol’da Aksaray’da sâkin Mehmed Emin Efendi b. İbrahim nâm kimesne medîne-i Üsküdar’da B[âb] Mahkemesi’nde meclis-i şer‘-i hatîrde medîne-i mezbûreye tâbi‘ Samandıra karyesinde vâki‘ Yedekci Mehmed Ağa Câmi‘-i şerîfi Vakfı’nın evlâdiyet ve meşrûtiyet üzere mütevellîsi Yedekcizâde Mehmed Tâhir Efendi b. el-Hâc Ali mahzarında vakf-ı mezbûr müstagallâtından olup Rumelihisârı’nda Şücâeddin mahallesinde vâki‘ eşcâr-ı müsmireyi hâvî bir kıt‘a bağçeyi icâreteyn ile bana îcâr edip lâkin bağçe-i mezkûre Sultan Bâyezid Han Vakfı müstagallâtından olmağla lede’l-mürâfa‘a mütevellîsi yedimden nez‘ etmekle mu‘accelesinden kabzı[nı] mu‘terif olduğu yedi yüz elli guruş deyni mukābelesinde vefâen ferâğ eylediği bir bâb menzilinin hîn-i ferâğında harc-ı temessük ve menzil-i mezkûr ücretinden zimmetinde terâküm eden yüz on guruş ki cem‘an sekiz yüz altmış guruşu mezbûr Mehmed Tâhir Efendi’den taleb ederim deyü ba‘de’d-da‘vâ ve’l-istintâk ve’l-ikrâr mûcebiyle menzil-i mezkûru rehniyetden fekk ile mezbûr Mehmed Tâhir Efendi’ye teslîm ve mezbûr Mehmed Tâhir Efendi dahi meblağ-ı mecmû‘-ı merkūm sekiz yüz altmış guruşu müdde‘î-i mezbûr Mehmed Emin Efendi’ye edâ ve teslîme ta‘ahhüd eyledikleri bi’l-iltimâs huzûr-ı âlîlerine i‘lâm olundu. Fî 27 min-Ş sene 1206