Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 732 Hüküm no: 1203 Orijinal metin no: [98b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cizyedar Kapıcısı Hurşid b. Yusuf’un borcunu ödemesi Ma‘rûz; Medîne-i Üsküdar’da Selami mahallesi sükkânından olup işbu bin iki yüz altı senesi mahmiye-i İslâmbol’da vâki‘ Vezirhan’ı Cizyedârı Musa Ağa b. Mehmed medîne-i mezbûrede mahfil-i bâbda meclis-i şer‘-i hatîrde cizyedâr kolcusu Hurşid b. Yusuf mahzarında mezbûr Hurşid sene-i mezbûrede cânib-i mîrîden cibâyetine memûr olduğum cizye evrâkından yedimden ahz ü kabz eylediği cizye evrâkının hesâbını sahîhan rü’yet eyledikden sonra zimmetinde zuhûr eden altmış dokuz buçuk guruş deyni içün işbu yedime i‘tâ eylediği sene-i mezbûre târihiyle müverrah bir kıt‘a deyn temessüğü mantûkunca meblağ-ı merkūm altmış dokuz buçuk guruş ve hâric ez-temessük bir evsat bahâsından beş buçuk guruş ki cem‘an yetmiş beş guruşu mezbûr Hurşid’den taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm yetmiş beş guruşun edâsıyla mezbûr Hurşid şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 20 min-Ş sene 1206