Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 735 Hüküm no: 1212 Orijinal metin no: [99b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz halinden şikâyet edilen Hafize bt. Abdullah’ın oturduğu Aşçıbaşı mahallesinden çıkarılması Ma‘rûz Medîne-i Üsküdar’da Aşcıbaşı mahallesi sükkânından İmâm Hafız İsmail Efendi b. Mehmed ve Abdulkadir b. Yusuf ve Ali b. Mehmed ve Mustafa Ağa b. Mehmed ve Salih b. Ahmed ve Mustafa Beşe b. Ahmed nâm kimesneler medîne-i mezbûrede mahfil-i Bâb’da meclis-i şer‘-i hatîrde Kahve Hammâlı zevcesi demekle meşhûre mu‘arrefetü’z-zât Hafîze bt. Abdullah nâm hatun mahzarında mezbûre Hafîze kendi hâlinde ırzıyla mukayyede olmayıp hadîdetü’l-lisân olup dâimâ mûcib-i ta‘zîr olur elfâz-ı kabîha ile herbirimize şetm ve ırzımızı hetk etdiğinden gayrı mahallenizi ihrâk bi’n-nâr ederim deyü bizleri ihâf ve ta‘cîz ve tekdîrden hâlî olmamağla işbu yedimizde olan bir kıt‘a i‘lâm-ı şer‘î mûcebince mukaddemâ mahalle-i mezbûreden ihrâc olunmuşdu. Lâkin mezbûre Hafîze yine mahalle-i mezbûrede iskân ve ef‘âl-i kabîhasında ısrâr etmekle bi’d-defa‘ât kendiye nush ü pend eylediğimizde mütenassıha olmamağla kendüden bi’l-külliye emniyetimiz meslûb olmuşdur deyü mezbûre Hafîze’nin sû’-i hâlini herbiri muvâcehesinde ihbâr ve fîmâ-ba‘d mahalle-i mezbûreden mezbûre Hafîze’nin ihrâcını ahâli-i mezbûrûndan herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 14 min-N sene 1206.