Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 736 Hüküm no: 1213 Orijinal metin no: [99b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogos v. Sahak’a borcundan dolayı hapiste bulunan Keresteci Parsih v. Arakil’in kefilsiz serbest bırakılması gerektiği Ma‘rûz Medîne-i Üsküdar’da Yenimahalle’de mütemekkin der-kenâr mantûkunca medîne-i mezbûre ustası habsinde olan Kereste[ci] Parsih v. Arakil bâ-fermân mahbûsen meclis-i şer‘a hâzır olup dâyin-i mersûm Bogos v. Sahak nâm zimmî muvâcehesinde ber-mûceb-i i‘lâm üzerime hükm-i şer‘î lâhık olan altı yüz on yedi guruş el-yevm hâlen ve def‘aten edâya iktidârım olmayıp hâlâ mu‘sir ve mu‘dim olduğuma binâen vakt-i yesârıma değin sebîlim tahliye olunmak matlûbumdur deyü âsârını iddi‘â ve dâin-i merkūm dahi âsârını münkir olmağla medyûn-ı mesfûrun âsârına ikāmet eylediği hem-civârlarından Ahmed Beşe b. İsa ve Ali Beşe b. İbrahim ve Mehmed Beşe b. Ali ve İsmail b. Hasan nâm dört nefer Müslimîn ve mahalle-i mezbûre ahâlisinden Papa Bedros v. Agop ve Sarrâf Ağasi v. Artin ve Parsih v. Kigork ve Ayan v. Manok ve Marat v. Ağya ve Agop v. Artin ve Bogos v. Toros ve Agop v. Ohannes ve Karabet v. Ayan ve Serkiz v. Sefer ve Kigork v. Mardoros ve Aron v. Nikagos ve Ağnadyos v. Toros ve Serkiz v. Bedros nâm on dört nefer zimmîler meclis-i şer‘-i hatîrde medyûn-ı mersûm el-yevm deyn-i mezkûrun edâsına kādir olmayıp mu‘dim ve mu‘sirdir deyü dâin-i mesfûr Bogos’un muvâcehesinde edâ-i şehâdet-i şer‘iye etdiklerinden sonra mersûm Bogos medyûn-ı mesfûrun yesârını isbâtdan izhâr-ı acz etmekle medyûn-ı mersûmun dâyini muvâcehesinde vech-i şer‘î üzere âsârı sâbit olmağla “fe-naziretun ilâ-meyseretin” nass-ı kerîmi mûcebince yesârı zuhûruna değin şer‘an bilâ-kefîl ıtlâk buyurulmak lâzım geldiği huzûr-ı âlîlerine i‘lâm olunur. Fî 16 min-N sene 1206.