Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 737 Hüküm no: 1214 Orijinal metin no: [99b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daha önce işlediği suçtan dolayı Bursa’ya sürgün edilen Mustafa Dede’nin affedildiği Ma‘rûz İşbu arzuhâl ve der-kenâra nazar ve mahallesi ahâlisinden keyfiyeti istintâk ve muktezâsı i‘lâm oluna deyü bâlâsı sahh-ı mekârim ile mu‘anven sâdır olan fermân-ı âlîlerine imtisâlen medîne-i Üsküdar’da Kādıasker mahallesi ahâlisinden olup der-kenârda ismi mezkûr Mustafa Dede b. Ali nâm kimesnenin keyfiyeti istintâk için mahalle-i mezbûre ahâlisinden işbu hâzırûn bi’l-meclis Hafız Ahmed Efendi b. Osman ve Teberdâr Osman Ağa b. el-Hâc Ali ve Hasan Çelebi b. Kasım ve Molla Hüseyin b. Hasan ve Hasan b. İbrahim nâm kimesnelerden istihbâr olundukda mezbûr Mustafa Dede der-kenâr nâtık olduğu üzere cürm-i sâbıkı’çün li-ecli’t-tedîb Bursa’da ikāmet etmek üzere nefy olunmuşdu. Lâkin mezbûr alîl ve kût-ı yevmiyeye muhtâc olduğundan mâ‘adâ bu tarafda ıyâli dahi fakīre ve muhtâce ve her vechile hâlleri dîğer-gûn olup cürm-i sâbıkından keff-i yed edip ıslâh-ı nefs eylediğini herbiri alâ tarîki’ş-şehâde ihbârlarıyla zâhir ve fîmâ-ba‘d bu misillü harekât-ı nâ-marzıyede bulunmamak üzere nefsine ve hîn-i mutâlebede huzûr-ı hükkâma ihzârına tekeffül ve ta‘ahhüd etmeleriyle mezbûr Mustafa Dede şâyeste-i afv ve merhamet olmağın bâkī fermân re’y-i rezîn-i âlîlerine menût olduğu huzûr-ı âlîlerine i‘lâm olunur. Fî 20 min-N sene1206.