Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 738 Hüküm no: 1216 Orijinal metin no: [100a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraç Seyyid Halil’in dükkânını kendisine enserci gediği olarak kiraya vermesi için Hacı Mustafa Efendi aleyhine açtığı davanın reddolunduğu Ma‘rûz Medîne-i Üsküdar’da Gerede mahallesinde sâkin Sarrâc es-Seyyid Halil b. es-Seyyid Hüseyin medîne-i mezbûrede mahfil-i Bâb’da meclis-i şer‘-i hatîrde el-Hâc Mustafa Efendi b. el-Hâc Hüseyin mahzarında medîne-i mezbûrede Ahmed Çelebi Vakfı musakkafâtından olup Selmanağa mahallesinde vâki‘ ma‘lûmü’l-hudûd bir kepenk enserci dükkânı sekiz sehm i‘tibârıyla dört hissesi el-Hâc Mehmed Emin Ağa’nın ve bir hissesi ceddem Habibe Hatun’un ve üç hissesi mezbûr el-Hâc Mustafa Efendi’nin taht-ı tasarrufunda olmağla bin iki yüz dört senesi Şa‘bâni’l-mu‘azzamı gurresi târihiyle müverrah yedimde olan bir kıt‘a temessük mûcebince dükkân-ı mezkûrda olan üç hissesinin tasarrufunda gedik i‘tibâr edip bilâ-âlât-ı lâzıme-i ma‘lûme ancak gedik lafzını müş‘ir zikr olunan temessüğü müceddeden tahrîr ve temhîr ve yedime i‘tâ ve üç hisse ebniyesini ücret-i ma‘lûme ile bana îcâr ben dahi ber-vech-i muharrer sâkin iken târih-i i‘lâmdan altı ay mukaddem beynimizde olan akd-i icâreyi feshetmişdik hâlâ mezbûr el-Hâc Mustafa Efendi zikr olunan hisselerini işbu hâzır bi’l-meclis Berber Molla İbrahim b. Mahmud nâm kimesneye ücret-i ma‘lûme ile îcâr etmekle bizim dükkânımız sarrâc gediği değildir ve dükkân-ı mezkûrda sarrâc gediği yokdur deyü ber-vech-i muharrer gedik tasarrufundan beni men‘ etmekle ancak yedimde olan temessük mûcebince dükkân-ı mezkûru gedik i‘tibârıyla kemâ-fi’s-sâbık bana îcâr eylesin deyü takrîr-i meşrûhu üzere tasaddî eylediği da‘vâsına iltifât olunmadığı bi’l-iltimâs huzûr-ı âlîlerine i‘lâm olunur. Fî 3 min-Ş sene 1206.