Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 740 Hüküm no: 1222 Orijinal metin no: [100b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ahmed’in cesedinin incelenerek defnine izin verildiği Ma‘rûz Vârid olan fermân-ı âlîlerine imtisâlen kıbel-i şer‘-i şerîfden meb‘ûs Salih Efendi dâ‘îleri ve izzetli bostancıbaşı tarafından müte‘ayyin Çukadâr Abdullah ve sâir mazbûtü’l-esâmî Müslimîn ile medîne-i Üsküdar hâricinde İbrahim Ağa Zâviyesi kurbünde vâki‘ Dârü’s-sa‘âde Ağası Çayırı’nda Köseç Mustafa Paşa’nın yed ve hizmetinde iken piştov kurşunuyla mecrûhan vefât eden es-Seyyid Ahmed’in üzerine varıp târih-i i‘lâm gecesi sâ‘at ikide bir kimesne darb ve firâr etmekle müteveffâ-yı mezbûrun a‘zâsına nazar eylediklerinde müteveffâ-yı mezbûr sağ memesi üzerinden kurşun ile darb ve arkasından nüfûz ve müte’essiren vefât eylediğini ba‘de’l-keşf ve’l-mu‘âyene cârihinden suâl olundukda yine paşa-yı mûmâ-ileyhin etbâ‘ından Alâiyeli İbrahim nâm kimesne ile nizâ‘ları esnâsında darb eyledi deyü ihbâr ve defnine izin birle vâki‘ hâli mezbûr dâ‘îleri mahâllinde ba‘de’t-tahrîr ve’l-inhâ mübâşir-i merkūm iltimâsıyla huzûr-ı âlîlerine i‘lâm olundu. Fî 29 min-N sene 1206.