Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 741 Hüküm no: 1224 Orijinal metin no: [100b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Ahmed’in Mustafa b. Mehmed’den beş yüz yirmi kuruş alacağı olduğu Ma‘rûz Medîne-i Üsküdar’da Selmanağa mahallesinde sâkin Mustafa Beşe b. Ahmed nâm kimesne meclis-i şer‘-i hatîrde diğer Mustafa b. Mehmed mahzarında mezbûr diğer Mustafa târih-i i‘lâmdan bir sene mukaddem mu‘anven ve mersûm i‘tâ eylediği bir kıt‘a temessük mantûkunca yedimden istidâne ve kabz ve kendi umûruna sarfla istihlâk eylediği sekiz yüz elli guruş hakkımın üç yüz altı guruşunu yedinden ahz beş yüz kırk dört guruşu mezbûr diğer Mustafa zimmetinde bâkī kalmağla hâlâ taleb ederim deyü da‘vâ ve mezbûr diğer Mustafa cevâbında meblağ-ı merkūm sekiz yüz elli guruş deyni olduğunu ikrâr lâkin müdde‘î-i mezbûrun kabzını mu‘terif olduğu üç yüz altı guruşdan mâ‘adâ ziyâde yüz guruş def‘ ve teslîm etmişdim deyü def‘a tasaddî ve beynlerinde ba‘de vukū‘i’l-münâza‘a bâ-tavassut-ı muslihîn müdde‘î-i mezbûr Mustafa müdde‘âsı olan meblağ-ı merkūm beş yüz kırk dört guruşun yirmi dört guruşunu hatt ü tenzîl eyledikde mezbûr diğer Mustafa dahi bâkī kalan beş yüz yirmi guruşu müdde‘î-i mezbûr Mustafa’ya edâ ve teslîm eylemek üzere ta‘ahhüd ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 4 min-N sene 1206.