Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 743 Hüküm no: 1228 Orijinal metin no: [100b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Hüseyin’in alacağı olduğu Ma‘rûz Mahmiye-i İslâmbol’da İskilib Hanı’nda sâkin Molla Hüseyin b. Osman nâm kimesne medîne-i Üsküdar’da mahfil-i Bâb’da meclis-i şer‘-i hatîrde Mehmed b. Hızır nâm kimesne mahzarında mezbûr Mehmed târih-i i‘lâmdan yedi gün mukaddem yedimden istidâne ve kabz ve umûruna sarfla istihlâk eylediği on üç guruş ile beynimizde ma‘lûm kendiden istîcâr eylediğim bârgir ücretinden ziyâde medfû‘um olan iki guruş dört para ki cem‘an on beş guruş dört para zimmetinde hakkım olmağla taleb ederim deyü ba‘de’d-da‘vâ ve’l-istintâk ve’l-ikrâr mûcibiyle meblağeyn-i mezkûreteyn on beş guruş dört paranın edâsıyla mezbûr Mehmed şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 10 min-Ş sene 1206.