Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 743 Hüküm no: 1230 Orijinal metin no: [101a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaşmalardan İstepan ve Nikola’nın bir yıllık çalışma sürelerini doldurmaları gerektiği Ma‘rûz Medîne-i Üsküdar’a tâbi‘ Kandilli karyesinde yanaşma makūlesinden İstepan v. Dragan ve Nikola v. Alço nâm zimmîler medîne-i mezbûrede mahfil-i Bâb’da meclis-i şer‘-i hatîrde karye-i mezbûre subaşısı Abdi Ağa b. el-Hâc İsmail ile terâfu‘larında mezbûr Abdi Ağa’nın bağçesinde hizmet-i mu‘ayyenesini görmek için bir sene tamamına dek herbirimiz yetmişer guruş ücret kavliyle işbu târih-i i‘lâma gelince altı ay hizmetimiz sebk edip hâlâ biz bilâ-özr fesh-i akd-i icâre ile ücret-i mezkûremizden altı aya isâbet eden otuz beşer guruşdan yetmiş guruşu mezbûr Abdi Ağa’dan taleb ederiz deyü da‘vâ ve mezbûr Abdi Ağa cevâbında müdde‘iyân-ı merkūmânı ol-mikdâr ücret ile istîcârını ikrâr lâkin müddet-i mezkûrelerini tekmîlini iddi‘â etmeğin mûcibiyle müddet-i mezkûrelerini tekmîle müdde‘iyân-ı merkūmâna tenbîh olunduğu bi’l-iltimâs huzûr-ı âlîlerine i‘lâm olundu. Fî 7 min-Şevvâl sene 1206.