Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 744 Hüküm no: 1231 Orijinal metin no: [101a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Osman’ın alacağı olduğu Ma‘rûz Medîne-i Üsküdar’da Yeniçeşme’de sâkin kalyoncu neferâtından es-Seyyid Osman b. Hüseyin medîne-i mezbûrede mahfil-i Bâb’da meclis-i şer‘-i hatîrde Çörekci Abdullah Beşe b. Ahmed mahzarında ben ücret ile hizmet eder makūleden olmamla târih-i i‘lâmdan bir sene mukaddem beher şehr dokuzar guruş ücret kavliyle beş ay mezbûr Abdullah Beşe dükkânında hizmet etmemle şühûr-ı mezkûrede müctemi‘ olan kırk beş guruş hakkımın dokuz guruşunu yedinden ahz ü kabz ve bâkī otuz altı guruş ile esnâ-yı hizmetimde yedimden istidâne ve kabz ve umûruna sarfla istihlâk eylediği elli guruş ki cem‘an seksen altı guruş zimmetinde hakkım olmağla taleb ederim deyü da‘vâ ve mezbûr Abdullah Beşe cevâbında fi’l-hakīka müdde‘î-i mezbûrun ber-vech-i muharrer hizmetini ikrâr ve cihet-i mezkûreden ber-vech-i muharrer elli guruş kabzını külliyen inkârından mâ‘adâ müdde‘î-i merkūm kabzını mu‘terif olduğu dokuz guruşdan ziyâde otuz altı guruşu dahi tamamen edâ ve teslîm etmişdir deyü herbiri âhardan eyledikleri müdde‘âlarını beyân ve isbâta kādir olamayıp herbirleri âharın talebiyle gıbbe’t-tahlîfi’ş-şer‘î mûcibiyle müdde‘î-i mezbûr es-Seyyid Osman ziyâde elli guruş mutâlebesiyle mezbûr Abdullah Beşe’ye bilâ-beyyine mu‘ârazadan ba‘de’l-men‘ meblağ-ı bâkī-i merkūm otuz altı guruşu dahi mezbûr es-Seyyid Osman’a edâ ve teslîme mezbûr Abdullah Beşe’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 5 min-Şevvâl sene 1206.